SQO-da sanıtar dárigerler turǵyndarǵa maska kııýge keńes berdi

PETROPAVL. QazAqparat – Soltústik Qazaqstan oblysynda jedel respıratorly vırýstyq ınfektsııany juqtyrǵandar sany kúrt artty. Ótken aptada 1657 adam aýyrǵan, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamentiniń málimetinshe, óńirde jedel-respıratorlyq vırýstyq ınfektsııany juqtyrǵandar sany 10 % artty.

Ótken aptada 1657 adam aýyryp, dárigerge kóringen.

Bıylǵy epıdemıologııalyq maýsymda tumaýmen aýyrǵandar da kóp. Qaýipti dertti 277 adam juqtyrǵan, onyń 250 jaǵdaıynda V tıpti, 27 jaǵdaıda A tıpti tumaý bolǵan.

Sonyń ishinde 23-i – «shoshqa», 4-i – «gonkong» tumaýy. Aýyrǵandardyń eshqaısy tumaýǵa qarsy ekpe qoıdyrmaǵan.

«Tumaýdy juqtyrǵandardyń 53-i – júkti áıel, 86-sy – 14 jasqa deıingi bala, sonyń jartysy – mektep oqýshysy. Qubylmaly aýa raıyna baılanysty óńirde epıdemıologııalyq jaǵdaı turaqsyz. Sondyqtan aýrýdy juqtyrmaý úshin maska kııýge, áleýmettik ara qashyqtyqty saqtaýǵa, halyq kóp júretin jerlerge barmaýǵa jáne jeke bas gıgıenasyn saqtap, qoldy jıi sabyndap jýýǵa keńes beremiz. Óıtkeni JRVI men tumaý vırýsy aýa-tamshy joldarymen ǵana emes, qolmen de kózdi, muryndy, aýyzdy ustaýdan shyryshty qabat arqyly berilýi múmkin. Budan basqa ımmýnıtetti kóterý qajettigin eske salamyz. S dárýmenin iship, jumys pen demalý rejimin saqtaǵan jón. Jetkilikti uıyqtap, durys tamaqtaný qajet», - deıdi sanıtar dárigerler.