SQO-da salyqtan jaltarǵandardyń kólikteri aıyppul turaqtaryna qoıylyp jatyr
Soltústik Qazaqstan oblysynda memlekettik kirister organdary, polıtsııa jáne jeke sot oryndaýshylary birlesken reıd ótkizip, kólik salyǵyn tóleýden jaltarǵandardy anyqtap jatyr. Qaryzy barlardyń kóligi birden aıyppul turaǵyna qoıylady.
Elimizde ótken jyl úshin avtokólik salyǵyn tóleý merzimi 1 sáýirde aıaqtaldy. Alaıda temir tulpardy tizgindegenderdiń arasynda bereshekten qutylýǵa asyqpaıtyndar da bar.
«Kólik salyǵynan qaryzy barlar eskertildi, biraq olar óz erkimen odan qutylýǵa asyǵar emes. Sondyqtan memlekettik kirister organdary, polıtsııamen jáne kólik quraldaryna salyq tólemeýshiler boıynsha jeke sot oryndaýshylarynyń aımaqtyq palatasy ókilderimen birge birlesken reıdter ótkizip jatyr. Mundaı is-sharanyń nátıjesi joǵary. Bereshegi barlar bir kún ishinde, keıde, tipti 15 mınýtta qaryzyn óteıdi. Qyrkúıek pen qarasha aıy aralyǵynda osylaısha 8,5 mln teńge óndirilip alyndy», - deıdi Petropavl qalalyq memlekettik kirister basqarmasynyń bólim basshysy ıÝrıı Belokopytov.
SQO-da kólik salyǵyn tólemeı júrgen boryshkerlerdiń sany 4 myńnan asady. Olardyń jalpy bereshegi – 245 mln teńge. Eger tólemegen salyǵy 1 AEK-ten asyp ketse, boryshkerdiń isi sot oryndaýshysyna jiberiledi.
«Reıd salyq tólemeı júrgen kólik ıelerin anyqtap, olardyń kólikterin aıyppul turaǵyna qoıý maqsatynda júrgiziledi. Mundaıda turǵyndar kólikterin qaryzdan tolyq qutylǵanda ǵana qaıtaryp ala alady. Ondaı jaǵdaıǵa jetkizbegen jón. Óıtkeni beresheginiń mólsherine qaraı dúnıe-múlkine, esep shotyna jáne elden shyǵýǵa tyıym salynýy múmkin. Buǵan qosymsha óndirilgen qaryzdyń 25% mólsherinde sot oryndaýshylardyń qyzmeti úshin tóleıdi», - deıdi jeke sot oryndaýshy Ardaq Qalkenov.