SQO-da respýblıkalyq mańyzy bar joldardy kútip ustaýǵa 1,7 mlrd teńge bólindi
SQO-daǵy respýblıkalyq mańyzy bar tas joldardyń jalpy uzyndyǵy - 1468 shaqyrym. Joldardy qalypty jaǵdaıda ustaý úshin kún saıyn 80 tehnıka men 200 adam jumyldyrylady.
«Qazirgi ýaqytta joldarda kóktaıǵaqqa qarsy jumystar júrgizilip jatyr. Arnaıy tehnıkanyń qum shashary, şetkasy jáne qar tazalaý úshin kúregi bar. Mundaı KamAZ-dardyń 28-i bar kásiporynda», - deıdi «QazAvtoJol» JShS SQOF bas ınjeneri Azamat Shúbekov.
Anatolıı Samkovskıı jol tehnıkasynyń birinde burynnan isteıdi. Kólik jańa, yńǵaıly.
«Jolda túrli jaǵdaılar kezdesedi, júrgizýshilerge qoldan kelgenshe kómektesip jatamyz. Men mingen kólikpen kóptegen jumys atqarylady. Mysaly taıǵaq jerlerge qum sebý, keıde jol jıegine shyǵyp ketken kólikterdi de tartyp shyǵaratyn kezderim bolady», - deıdi jumysshy.
Byltyr respýblıkalyq mańyzy bar joldarǵa jyldamdyqty ólsheıtin qurylǵylar ornatyldy. Eger kólik ıesi jyldamdyqty asyrsa, atalmysh quraldyń qyzyl túsi janady.
«Bolashaqta respýblıkalyq mańyzy bar joldardyń barlyǵyna, ásirese eldimekenderdiń janyna osyndaı qurylǵy ornatýdy josparlap otyrmyz. Jergilikti polıtsııa qyzmetimen birlese jumys atqarmaq nıettemiz, bizdiń qurylǵylardyń málimetteri boıynsha aıyppul tóleıtindeı etip», - deıdi «QazAvtoJol» UK» AQ SQOF dırektory Bolatbek Aıtbaev.
SQO aýmaǵynda kompanııanyń 5 jol-paıdalaný ýchaskesi jáne 13 beketi bar. Sondaı-aq, joldar jabylyp, qar qursaýynda qalǵan jaǵdaıda jolaýshylar 11 jylytý beketine toqtaı alady. Bul jerde olarǵa jatyn oryn men tamaq qarastyrylǵan.
Mamandardyń aıtýynsha, búgingi tańda oblystaǵy respýblıkalyq mańyzy bar joldardyń barlyǵy qardan tazartyldy.