SQO-da respýblıkalyq avtojoldarda bıyl 10 joba júzege aspaq

<p>PETROPAVL. KAZINFORM &ndash; Soltústik Qazaqstan oblysy arqyly ótetin respýblıkalyq mańyzy bar avtomobıl joldarynda bıyl 281 km jónge keltirilmek. Bul maqsatqa bıýdjetten 22 mlrd teńgege jýyq qarajat bólindi.</p>

«Qazavtojol» UK» AQ SQO boıynsha fılıalynyń málimetinshe, bıyl júzege asýy tıis on joba aıasynda 30 km jol jańǵyrtylady, jalpy uzyndyǵy 57,7 km bolatyn eki nysanda kúrdeli jóndeý júrgizilse, qalǵan 7 nysan – 193 km ortasha jóndeý jumysy atqarylady.

Respýblıkalyq mańyzy bar «Chelıabige barar RF shekarasy-Petropavl, Omby arqyly Novosibirge barar RF shekarasy» M-51 avtomobıl jolynyń 633-648 km tańdamaly túrde ortasha jóndeý jumysy bastaldy. Bul ýchaske SQO M.Jumabaev aýdanynyń aýmaǵynda ornalasqan, jalpy uzyndyǵy 14 km.

Foto: «Qazavtojol» UK» AQ SQO boıynsha fılıaly

Jumysty «DOROJNIK AShYQ ASPAN» JShS atqaryp jatyr. Shart byltyr qarasha aıynda jasaldy. Merdiger kompanııa jol betin tegistep, asfaltbeton jabynyn jónge keltiredi jáne jol jıekterin ornatady. Sondaı-aq jol tańbalaryn salyp, jol belgilerin aýystyrý josparlanǵan. Jumys bıyl aıaqtalady.

Jobany iske asyrý nátıjesinde avtomobıl jolymen júrý ýaqyty qysqarady jáne tehnıkalyq sıpattamasy jaqsaryp, óńirdiń kóliktik-logıstıkalyq áleýetin arttyrýǵa múmkindik beredi.

Jalpy bıyl respýblıkalyq mańyzy bar avtojoldardy qaıta jańartý, jóndeý jáne kútip ustaý jumystaryn júrgizýge respýblıkalyq bıýdjetten 21,9 mlrd teńge kóleminde aqshalaı qarajat bólindi.

Buǵan deıin Petropavldaǵy «Solnechnyı-2» shaǵyn aýdanynda tasqynnan zardap shekkenderge salynyp jatqan úılerdiń alǵashqy legi 5 maýsym kúni paıdalanýǵa beriletindigin aıtqan edik.