SQO-da referendýmda 600-ge jýyq ýchaske jumys isteıdi

<p>PETROPAVL. KAZINFORM &ndash; 6 qazan kúni ótetin jalpyulttyq referendýmda Soltústik Qazaqstan oblysynan 375 236 adam quqyǵyn paıdalanyp, daýys bere alady. Qazir óńirde daıyndyq jumysy júrip jatyr.</p>

Atom elektr stantsııasyn salýǵa qatysty referendýmnyń ótýine sanaýly kún qaldy. SQO referendým komıssııasynyń málimetinshe, 15 qyrkúıek kúni óńirde ýchaskeler ashyldy, olar naýqandy ótkizýge daıyn. Oblys boıynsha referendým ýchaskeleriniń sany - 591, sonyń ishinde 97-si Petropavlda ornalasqan. Sondaı-aq ýaqytsha bolý oryndarynda 13 ýchaske ashylǵan.

Referendýmda 606 komıssııa jumys istemek. Onyń 15-i aýmaqtyq, qalǵany ýchaskelik komıssııalar. Aýmaqtyq komıssııalardyń 105, al ýchaskelik komıssııalardyń 3325 múshesi bar.

«Referendým 6 qazan kúni tańǵy saǵat 7.00-de bastalyp, keshki 20.00-ge deıin jalǵasady. Daýys berýshiler «ıá, kelisemin» nemese «joq, kelispeımin» degen eki nusqanyń bireýin tańdaıdy. Kele almaıtyndarǵa úılerine jáshik aparylady. Sondaı-aq múgedektigi bar adamdardyń quqyǵy buzylmaýyn da eskeremiz», - deıdi SQO referendým komıssııasynyń múshesi Saǵyndyq Rahymjan.

Buǵan deıin 2025 jyldan bastap oblys ortalyqtarynyń ákimderi saılanatynyn jazǵan edik.