SQO-da polıtseıler sýıtsıd jasamaq bolǵan azamatty qutqaryp qaldy
Birer kún buryn, saǵat 15:00 shamasynda SQO Aqqaıyń aýdandyq polıtsııanyń kezekshi bólimine Smırnovo aýylynyń sý munarasynyń basynda turǵan er adam týraly habarlama tústi. Dabyl sıgnaly boıynsha oqıǵa ornyna polıtsııa, TJ bólimi, prokýratýra, medıtsınalyq qyzmet qyzmetkerleri keldi.
44 jastaǵy jergilikti turǵyn 20 metr bıiktikten sekiremin dep qorqytqan. Sol jerde onymen aýdandyq polıtsııa bólimi bastyǵynyń birinshi orynbasary Rýslan Baıjanov kelissóz júrgizdi. Sodan keıin munaranyń tóbesine JPQ bólimshesiniń bastyǵy Aleksandr Lızýn kóterildi.
«Aýyl turǵynynyń emotsıonaldy jaǵdaıyn eskere otyryp, basty mindet ony sekirýden saqtaý boldy. Uzaq ýaqyt boıy onymen sóılesip, tynyshtandyrýǵa tyrystym. Sátti jaǵdaı paıda bolǵan kezde qolynan ustap, tómen jaqqa túsýge kóndirdim. Baspaldaqta polıtsııa bastyǵynyń orynbasary Nıkolaı Popov kútip turdy, túsý kezinde ol er adamdy saqtandyryp turdy, – dedi Aleksandr Lızýn.
Quqyq qorǵaý organdary qyzmetkerleri men dárigerlerdiń saýatty birlesken is-qımyldarynyń arqasynda qaıǵyly jaǵdaıdyń aldy alyndy. Qazirgi ýaqytta er adammen psıholog jumys istep jatyr.