SQO-da polıtseıler qys túskeli joldardy 40 ret tekserip, olqylyqty joıýǵa 9 uıǵarym berdi

PETROPAVL. QazAqparat – Soltústik Qazaqstan oblysynda polıtseıler joldardyń qysta talapqa saı bolýyn baqylaýda ustap, durys kútim jasamaǵan jaýaptylardy ákimshilik jaýapkershilikke tartyp jatyr, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, polıtseıler qys túskeli óńir joldaryna 40-tan astam tekseris júrgizdi. Ondaǵy maqsat – jaýapty uıymdardyń óz mindetterine salǵyrt qaramaı, tıisti jumystardy atqarýyn baqylaýda ustaý. Osylaısha qaýipsiz jol qozǵalysyn qamtamasyz etý.

«Qys bastalysymen ákimshilik polıtsııa qyzmetkerleri avtojoldarda tótenshe jaǵdaılarǵa jol bermeý maqsatynda táýlik boıy kezekshilik atqaryp jatyr. Joldyń sapasy únemi tekserilip, onyń nátıjesi boıynsha olqylyqtardy joıýǵa jaýapty tulǵalarǵa uıǵarymdar beriledi. Keı jaǵdaılarda ákimshilik yqpal etýge týra kelip jatady», - deıdi SQO PD ákimshilik polıtsııa basqarmasynyń bastyǵy Serik Áljanov.

Jol uıymdary ókilderiniń qatysýymen bolǵan osyndaı tekseristerdiń birinde respýblıkalyq mańyzy bar joldyń 6 ýchaskesin qar basqany anyqtaldy. Bul kólikterdiń júrisin qıyndatyp, jol-kólik apatyna ákelýi múmkin. Sol sebepti jaýapty tulǵaǵa ákimshilik quqyqbuzýshylyq boıynsha hattama toltyryldy.

«Óńirdiń kúrdeli klımattyq jaǵdaıynda joldardy qysta kútip ustaýdyń mańyzy zor. Qar túskeli respýblıkalyq mańyzy bar joldar men jol qurylystaryna 26 tekserý júrgizildi, kemshilikterdi joıý týraly 19 nusqama berildi. Oblystyq mańyzy bar joldarda 17 tekserý júrgizilip, 9 uıǵarym berildi. Birqatar jaýapty tulǵalar ákimshilik jaýapkershilikke tartyldy. Atqarylǵan jumystyń maqsaty – jol apattarynyń aldyn alý», - deıdi Serik Áljanov.