SQO-da pılotsyz ushatyn apparattyń 27 túri qurastyrylady
Pılotsyz ushatyn apparattar Petropavl aýyr mashına jasaý zaýytynyń bazasynda qurastyrylyp jatyr. Ázirge 4 túri jasalǵan. Olardyń árqaısysynyń atqaratyn qyzmeti bar. Bireýi 3D karta jasap, 7 shaqyrym bıiktikke kóterile alady. Bir saǵatta 60 shaqyrymdy eńseredi eken. Endi biri joǵalǵan adamdardy, qylmyskerlerdi izdeýge arnalǵan.
«Ushý apparatyna qajet materıaldyń barlyǵy Qytaıdan ákelingen, bul jerde tek qurastyrdyq, ıaǵnı ónim ázirge 30 da 70 qatynasynda, qytaılyqtardyń úlesi basym. Qazirgi ýaqytta apparattyń korpýsy tolyq jergilikti zaýytta jasalǵan. Biraq bolashaqta bizdiń áriptesterimizben 50 de 50 prıntsıpimen jumys istemekpiz. ıAǵnı keı bólshekterin jergilikti zaýytta jasaýdy qolǵa alamyz. Bul áriptestik QR ındýstrııa jáne ınfraqurylymdyq damý mınıstriniń Qytaıǵa sapary barysynda múmkin boldy. Ol jerde memorandýmǵa qol qoıyldy», - deıdi «Petropavl aýyr mashına jasaý zaýyty» AQ bas dırektorynyń arnaıy ónimder jóninen orynbasary Tımýr Nýkereı.
Zaýyt jumysshylary arnaıy oqýdan, daıyndyqtan ótedi, olarǵa qytaılyq mamandar dáris oqıdy.
Qyzmetkerlerdiń alǵashqy legi osy maqsatta qyrkúıek aıynyń sońynda eki aıǵa Qytaıǵa jol tartady.
«Qazirgi ýaqytta Orta Azııa elderiniń ishinde osyndaı formattaǵy ushý apparatyn tek biz ǵana qurastyryp jatyrmyz. Tapsyrys túsisimen óndiris jolǵa qoıylady. Ázirge tek tájirıbelik úlgileri ǵana jasaldy. Bolashaqta pılotsyz ushatyn apparattyń 27 túrin jasap shyǵarý josparlanǵan. Olardyń negizgi mindeti – foto-, beınetúsirilim júrgizý, áskerıler úshin taptyrmas qural. Aýyl sharýashylyǵy salasynda qoldanýǵa bolady, múmkindigi zor. Qashyqtan basqarylatyn apparatty kólik bara almaıtyn jerlerdegi órtti sóndirýge de paıdalansa bolady», - deıdi Tımýr Nýkereı.
Bir apparatty qurastyrýǵa qazir 1-3 aı aralyǵynda ýaqyt qajet. Keıin qajetti qondyrǵylarmen tolyq jabdyqtalǵannan keıin bul merzim aıtarlyqtaı qysqarmaq.
Jalpy jańa joba aıasynda 40 adam jumyspen qamtylmaq.