SQO-da 25 jylǵa bas bostandyǵynan aıyrylǵan adam bostandyqqa shyqty
Toqsanynshy jyldardyń sońynda Petropavl turǵyndaryn úreıde ustaǵan qylmyskerdiń qolynan 10 áıel men 1 kishkentaı qyz zardap shekti. Er adam halyq az júretin jerlerdi torýyldap, qurbandarynyń artynan kelip, baltamen bastan urǵan. Zorlap, tonap, sheship alǵan altyn buıymdardy áıeline syılaǵan. 1999 jyly qolǵa túsken manıak, kesilgen jaza — 25 jyldy tolyq ótep, bostandyqqa shyǵyp otyr.
Bul habardy Petropavl turǵyndary úreımen qarsy aldy. Qazir túrli messendjerlerde jáne áleýmettik jelide birin-biri eskertken habarlamalardy kezdestirýge bolady.
SQO Polıtsııa departamenti baspasóz qyzmetiniń málimetinshe Petropavl qalasynyń 60 jastaǵy turǵyny osy jyldyń 12 qańtarynda bas bostandyǵynan aıyrý oryndarynan bosap shyqty. Alaıda oǵan sottylyǵy tolyq ótelgenge deıin 8 jyl merzimge ákimshilik qadaǵalaý belgilengen.
Bostandyqqa shyqqannan keıin er adam oblys ortalyǵyna kelgen soń, áleýmettik beıimdeý ortalyǵyna ornalastyryldy. Polıtsııa ony «ákimshilik qadaǵalaýda turǵan adam» sanaty boıynsha profılaktıkalyq esepke aldy.
Sot esepte turǵan adamǵa qatysty birqatar shekteýler belgiledi: turǵylyqty úıinen saǵat 22.00-den tańǵy 6.00-ge deıin, qala syrtyna shyǵýǵa bolmaıdy, ishimdik men esirtki tutynýǵa, demalys oryndaryna barýǵa tyıym salynady. Belgilengen talaptardy baqylaý úshin elektrondyq baqylaý quraly — elektrondy bilezik qoldanyldy.
«Ony tekserý kestesi jasaldy. Jergilikti polıtsııa qyzmeti, krımınaldyq polıtsııa bóliminiń basshylyǵy, sondaı-aq aımaqtyq jedel ýákilder men ýchaskelik polıtsııa ınspektorlary jaýapty bolyp taǵaıyndaldy», - dedi polıtsııa qyzmetkerleri.