SQO-da paıdalanylmaı jatqan 330 myń ga jer memleketke qaıtarylmaq

PETROPAVL. QazAqparat – Soltústik Qazaqstan oblysynda bıyl zańsyz berilgen jáne paıdalanylmaı jatqan 330 myń ga jer memleket menshigine qaıtarylady. Osy másele boıynsha búginge deıin 121 talap-aryz sotqa berildi, taǵy 50-i daıyndalyp jatyr, dep habarlaıdy QazAqparat tilshisi.

SQO-da «AMANAT» partııasy oblystyq fılıaly janyndaǵy «Jer amanaty» óńirlik komıssııasynyń kezekti otyrysy ótip, jer máselesi talqyǵa tústi.

Oblystyq Jer resýrstaryn basqarý departamentiniń basshysy Baqytjan Bekishtiń aıtýynsha, bıyl bos jatqan 330 myń ga alqapty memleket menshigine qaıtarý mindeti tur. Sonyń 44,3 myń ga - 3,4 myń ga egistik jáne 38,5 myń ga jaıylymdyq jer búginde qaıtaryldy.

«Prezıdenttiń tapsyrmasyn oryndaý maqsatynda jyl basynan 18,4 myń ga alqapta 16 tekseris júrgizildi. Sonyń 17,4 myń ga 11 zańbuzýshylyq anyqtaldy. Bul jaıylymdyq jerlerdi maly joq sharýashylyqtar ustap otyrǵan. Olqylyqty joıý úshin Memlekettik kirister departamentine jer salyǵy mólsherlemesin 20 ese qoldaný týraly 11 uıǵarym jiberildi. 621 myń teńgeniń 8 aıyppuly salyndy», - deıdi Baqytjan Bekish.

Bıyl sotqa jer ýchaskelerin jalǵa alý kelisimsharttarynyń kúshin joıý maqsatynda 29 talap-aryz berilgen. Jalpy aýmaǵy 14,3 myń ga alqapty bergen kezde QR zańnamalary buzylǵany anyqtalǵan.

«Zań buzýshylyqtardy anyqtaý úshin «Qazaqstan Ǵarysh Sapary» UK» AQ veb-portalynyń derekteri paıdalanylady, osy portaldyń 1 sáýirdegi deregi boıynsha 917,3 myń ga jaıylymdyq jer paıdalanylmaıdy, onyń ishinde 522 myń ga alańda mal basy joq, 395,3 myń ga júkteme 20% tómen. Osy málimetter jumysta qoldaný úshin aýdandyq jer qatynastary bólimderine jiberildi», - deıdi departament basshysy.

SQO Aýyl sharýashylyǵy jáne jer qatynastary basqarmasynyń málimetinshe, qazirgi ýaqytta paıdalanylmaǵan jerlerdi qaıtarý boıynsha 27 adamnan quralǵan vedomstvoaralyq top jumys isteıdi.

«Byltyr memleket menshigine bos jatqan 304 myń ga aýyl sharýashylyǵy jeri qaıtaryldy. Onyń 23,5 myń ga egistik, 260 myń ga jaıylymdyq jer. Bul jerdiń 40,3 myń ga eldi mekenderge aýyl malyn jaıý úshin berildi. Taǵy sonshasy konkýrspen sharýashylyqtarǵa jalǵa berildi. Qalǵanynyń jer-kadastrlyq qujattary ázirlenip jatyr.

Bos jerlerdi qaıtarý boıynsha sotqa jalpy aýdany 27,5 myń ga 121 talap-aryz, onyń ishinde aýyl sharýashylyǵy basqarmasynan – 103, jer resýrstaryn basqarý departamentinen 18 talap aryzdar berildi. Sot-shaǵym jumysy jalǵasady, taǵy 50 talap aryz berý josparlanǵan», - deıdi SQO Aýyl sharýashylyǵy jáne jer qatynastary basqarmasynyń basshysy Meıram Meńdibaev.