SQO-da paı boıynsha 41 myń adamnyń aqysyn jegen 70 sharýashylyq anyqtaldy

PETROPAVL. QazAqparat – Soltústik Qazaqstan oblysynda prokýratýra «PAI boıynsha óz quqyǵyńdy qorǵa» atty jobany qolǵa aldy, dep habarlaıdy QazAqparat tilshisi.

SQO prokýratýrasynyń málimetinshe, bul jobanyń maqsaty – eldi mekenderde jer úlesi bar turǵyndardyń máselesin sheship, quqyqtaryn qorǵaý.

Osy maqsatta qadaǵalaýshy organ oblystaǵy jer úlesi bar azamattardyń jalpy sanyn, paıdaǵy jerdiń naqty aýmaǵyn anyqtaý úshin revızııa jasady. Jıi kezdesetin máselelerdi anyqtady.

«Tekseristiń qorytyndysy boıynsha, 70 sharýashylyqtyń 41 myń adamnyń paı úshin alýy tıis aqysyn durys bermeı otyrǵandyǵy anyqtaldy. Budan basqa paıshylardyń negizgi problemalary – jerdiń zańsyz kepilge qoıylýy nemese shartty jer úlesterin joǵaltý, kásiporyn quramynan shyǵýǵa kedergi keltirý, paıǵa tıisti dıvıdentterdi tólemeý.

Tekseris barysynda paıshylardyń shartty jer ýchaskelerin olardyń kelisiminsiz kepilge qoıyp, kredıt alýdyń turaqty qoldanylyp kelgen tásilderi anyqtaldy», - delingen prokýratýra taratqan habarlamada.

Osy másele boıynsha oblys prokýrory Baǵban Taıymbetov Aıyrtaý, Shal aqyn, Taıynsha, Esil, Ǵ. Músirepov aýdandaryna baryp, paı boıynsha máselesi bar aýyl turǵyndarymen kezdesýler ótkizdi.

Paıshylardyń quqyqtaryn qorǵaý maqsatynda 28 talap aryz engizildi.

Bul jumys jalǵasyn tappaq.

Esterińizge salaıyq, buǵan deıin prokýrorlardyń aralasýymen 2020 jyldan bastap jer zańnamasy salasynda júrgizilip jatqan júıeli jumys nátıjesinde aýdany 124 myń ga bolatyn 232 jer ýchaskesi qaıtarylǵanyn aıttyq. 26 problemalyq kásiporyndaǵy jalpy aýmaǵy 257 myń ga bolatyn 11 myńnan astam paı ıesiniń quqyǵy qorǵaldy.