SQO-da ózenderdiń sýy bir táýlikte metrden joǵary kóterildi

PETROPAVL. QazAqparat – Soltústik Qazaqstan oblysynda ózenderdiń sýy kóterilip keledi, degenmen áli qaýipti deńgeıge jete qoıǵan joq, dep habarlaıdy QazAqparat tilshisi.

«Qazgıdromet» RMK SQO fılıalynyń málimetinshe, óńirde 19 gıdrologııalyq beket bar. Ózen-kólderde ornalasqan ondaǵy jaǵdaıdy mamandar qazir kúnine birneshe ret baqylap otyrady. Jyly aýa raıyna baılanysty qar men muz qarqyndy erip, sý qoımalarynyń deńgeıi kóterilip jatyr.

Máselen, Ǵ.Músirepov aýdany Rýzaevka eldi mekeniniń mańynan ótetin Sharyq ózeninde sý deńgeıi bir táýlikte 122 sm artqan. Aıyrtaý aýdany Vozvyshenka eldi mekeni mańynda Aqanburlyq ózeniniń sýy 117 sm kóterilgen.

Esil ózeninde de sý deńgeıi kóterilip keledi. Shal aqyn aýdany Kreşenko eldi mekeni mańyndaǵy gıdrologııalyq bekette bir táýlikte sý deńgeıi 93 sm, Ǵ.Músirepov aýdany Toqsan bı aýylynyń mańynda 92 sm ózgergen. Muzy sógilip, seń júrip jatyr.

Shal aqyn aýdany Sergeevka sý qoımasynda sý deńgeıi bir táýlikte 47 sm ózgerdi. Qazirgi ýaqytta mamandardyń aıtýynsha, sý qoımasy 86,7 % tolǵan.

Jalpy, SQO-da aldaǵy úsh kún boıy jyly temperatýra saqtalmaq. Sınoptıkterdiń málimetinshe, búgin oblysta synap baǵanasy +15 gradýsqa deıin kóterilse, 5 sáýirde +17, 6 sáýirde +15 gradýs bolady. Eki kún boıy jaýyn-shashynsyz. 6 sáýirde jaýyn jaýady dep kútilýde.