SQO-da otbasynyń shyrqyn buzǵan 400-den astam turǵyn qamaldy
SQO Polıtsııa departamenti baspasóz qyzmetiniń málimetinshe, urys-keris, janjal men daý-damaı – osynyń bári qarjylyq táýeldilik saldarynan týyndaıtyn otbasylyq-turmystyq qatynasqa qatysty quqyq buzýshylyqtar. Qylmystar men quqyq buzýshylyqtardyń aldyn alý – jergilikti polıtsııa qyzmeti ınspektorlary jumysyndaǵy basymdyqtardyń biri. Bul baǵytta mamandandyrylǵan 15 ınspektor jumys isteıdi.
«Taldaýdy negizge alsaq, kóp jaǵdaıda turmystyq zorlyq-zombylyqtyń qurbany áıelder eken. Áıelder jarııa etýden qoryqqannan ári erlerin aıaǵandyqtan otbasylyq zorlyq-zombylyqtyń besten biri ǵana memlektik organdarǵa aıan bolyp jatady. Polıtsııa tarapynan otbasylyq janjalqoılardy sabasyna túsirýdiń tıimdi ádisi – olardy ákimshilik jaýapkershilikke tartý», - deıdi SQO PD bastyǵynyń birinshi orynbasary Qanat Aıtbaev.
SQO-da jeti aıdyń ishinde otbasynyń shyrqyn alǵan 1148 adam jaýapkershilikke tartyldy. Onyń 429-y qamalyp, 137-sine eskertý jasaldy jáne 60-yna aıyppul salyndy.
Qanat Aıtbaevtyń aıtýynsha, mundaı qylmystardyń jasalýyna kóp jaǵdaıda maskúnemdik sebep bolyp jatady. Jyl basynan oblys boıynsha alkogolge qatysty zańnamany buzýdyń 7 myńdaı deregi anyqtaldy. Zańsyz aınalymnan 5445 lıtr alkogol alyndy. 484 maskúnem esepke qoıyldy. 137 adam májbúrlep emdeýge jiberildi. Alaıda otbasylyq janjaldarǵa ýchaskelik ınspektorlardy shaqyrý azaıar emes, ásirese demalys jáne mereke kúnderi shaqyrtýlar kóp túsedi.
Quqyq buzýshyǵa ákimshilik yqpal etý maqsatynda qorǵanys uıǵarymy beriledi. Bul jábirlenýshiniń izine túsýine, oǵan qatysty aýyzsha ne jazbasha sóılesýlerge jol bermeıdi. Jyl basynan oblys boıynsha 1637 qorǵanys uıǵarymy shyǵaryldy. Ony buzǵany úshin 86 janjalqor ákimshilik jaýapkershilikke tartyldy.
Polıtseıler turmystyq zorlyq-zombylyqqa tap bolǵandardy úndemeı qalmaı, polıtsııaǵa: ınspektorlarǵa jáne áıelderdi zorlyq-zombylyqtan qorǵaý ınspektorlaryna júginýge shaqyrady. Oblys ortalyǵynda «Mejdý namı govorıa» @mejdunamigovory Telegram-kanaly quryldy, sondaı-aq Petropavl qalalyq polıtsııa basqarmasynyń 8-708-432-45-61 WhatsApp nómiri jumys isteıdi. Qajet bolǵan jaǵdaıda búgingi kúni «102» mobıldi qosymshasy arqyly (QR ІІM App Store jáne Google Play resmı qosymshasy) beıneqońyraý ne habarlama jazýmen júginýge bolady.