SQO-da otandyq ónimdi óńdeý jáne Qytaıǵa eksporttaý boıynsha eń iri ortalyq qurylyp jatyr
Soltústik Qazaqstan oblysy egis alqaby 4,4 mln ga negizgi astyq egetin óńirlerdiń biri jáne qýatty aýyl sharýashylyǵy qurylymdaryn qurý jáne qoldaý boıynsha elimizdegi eń ozyq aımaq sanalady. Taýarly-sút fermalaryn, qus fabrıkalaryn jáne sýarý jobalaryn salýdy jeńildetilgen nesıelendirýdiń sátti tájirıbesi basqa óńirlerde ekinshi jyl qatarynan keńeıip keledi. Sút baǵyty óńirdiń jalpy óńdeý kóleminde 35% úlesti alady, sondaı-aq astyq óńdeý (19%), maı óńdeý (6,5%), et óńdeý (7%) salalary damyǵan.
Taıynsha aýdanynda Qytaı ınvestorlarynyń qatysýymen dándi daqyldar («Memolux» JShS) men maıly daqyldardy («Taıynsha Maı» JShS) óńdeý boıynsha iri klaster salyndy. Aımaq aýylynda táýligine 300 tonna un shyǵaratyn dıirmen kesheni men jylyna 300 myń tonnany quraıtyn jem zaýyty iske qosyldy. Qýatty ulǵaıtý jáne makaron ónimderin óndirý tsehynyń qurylysy júrgizilýde. Kórshi Ilıchevka aýylynda tazartylmaǵan raps pen kúnbaǵys maıy men kúnjara óndiretin zaýyt salyndy.
Búginde «Taıynsha Maı» JShS men «Memolux» JShS óńirdegi Qytaıǵa eksportqa baǵyttalǵan eń iri agrarlyq joba. Qytaılyq ınvestor, «Sıan Aı Tszıý» korporatsııasynyń prezıdenti, Alashankoý t/j stansasynda saqtaý kólemi 100 myń tonnalyq bond qoımasyna ıelik etedi. Kásiporynnyń Sıanda (QHR) 1 myńnan astam dúkeni bar jáne qazaqstandyq kondıterlik ónimder, syra, balmuzdaq jáne basqa da azyq-túlik ónimderin eksporttaýmen aınalysady. Korporatsııa Sıanda logıstıka jáne aýylsharýashylyq ónimderin qaıta óńdeý parkin saldy. Taıaý bolashaqqa arnalǵan josparda – qazaqstandyq ónimdi Qytaıǵa jetkizý úshin SQO-da uqsas kásiporyn qurý bar.
«Bizdiń astyq untaqtaý tehnologııamyz eń ozyq tehnologııanyń biri sanalady. Biz undy óte tómen temperatýrada 15 ret tartamyz, bul onyń barlyq paıdaly qasıetterin saqtaýǵa múmkindik beredi», - dep atap ótti Qytaıdyń «Sıan Aı Tszıý» korporatsııasynyń prezıdenti Tszıa Heı.
Kásiporynnyń Soltústik Qazaqstanda logıstıkalyq ortalyq salý josparyn eskere otyryp, Serik Jumanǵarın Qytaıǵa jetkizý úshin qazaqstandyq óndirýshilerdiń ónimderin biriktirý múmkindigin qarastyrýdy usyndy. Tszıa hýı bul usynysty qoldap, SQO-da qaıta óńdeý jáne logıstıka ortalyǵyn qurý arqyly Qytaıǵa ónim eksporttaıtyn Qazaqstandaǵy eń iri kompanııa bolýdy josparlap otyrǵanyn jetkizdi.
Sondaı-aq vıtse-premer shoshqa men iri qara mal soıý tsehynan bastap qaldyqsyz óńdeýge deıingi tereń tsıkldi et óńdeýdiń tolyq protsesin júzege asyratyn «EMS Agro» JShS et kombınatyna bardy. Qazirgi ýaqytta shoshqa kesheni qýatyn 200 myń basqa deıin 2 ese keńeıtýde. Byltyr 10 myń tonnaǵa jýyq shoshqa eti, sıyr eti, jartylaı fabrıkattar, shujyq ónimderi óndirildi. Jobalyq qýatyna shyqqan kezde shoshqa etin óndirý kólemi 20 myń tonnaǵa deıin ulǵaıady, kásiporyn Qazaqstandaǵy eń iri shoshqa kesheni bolady. Kásiporynnyń odan ári damýy Qytaıǵa shoshqa eksportynyń qaıta ashylýyna baılanysty.