SQO-da orynbasarynyń jemqorlyǵy úshin aýdan ákimi tártiptik jaýapkershilikke tartyldy

PETROPAVL. QazAqparat – Soltústik Qazaqstan oblysy Maǵjan Jumabaev aýdanynyń ákimi óz orynbasary Serik Qusanovtyń sybaılas jemqorlyq qylmysy úshin tártiptik jazaǵa tartylyp, qatań sógis aldy, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttiginiń SQO boıynsha departamenti basshysynyń birinshi orynbasary Aıdos Júnisov Maǵjan Jumabaev aýdanyna jumys saparymen bardy. Jaqynda aýdan ákiminiń orynbasary Serik Qusanov sybaılas jemqorlyq qylmysy úshin sottalǵan bolatyn.

Sybaılas jemqorlyqqa qarsy vedomstvonyń preventsııa basqarmasynyń basshysy Damır Habıbýlın ákimniń burynǵy orynbasary óziniń laýazymdyq jaǵdaıyn paıdalanyp, jol-qurylys kompanııasynyń dırektoryna Býlaev qalasynyń kóshelerin jańǵyrtý boıynsha memlekettik satyp alý týraly shart boıynsha qarjylandyrýdy ulǵaıtý múmkindigi bar ekendigi týraly jalǵan aqparat bergen.

«Bul fakt alaıaqtyqqa áreket retinde tanyldy, óıtkeni bul jumys túrin oryndaý týraly shart aýdan ákimdigimen emes, Býlaev qalasynyń ákimdigimen jasalǵan, sondyqtan shart boıynsha qarjylandyrýdy ulǵaıtý sottalýshynyń quzyretine kirmegen. Apellıatsııalyq satynyń sheshimi boıynsha Qusanovqa qylmystyq-atqarý júıesiniń ortasha qaýipsizdik mekemesinde jazasyn óteı otyryp, úsh jylǵa bas bostandyǵynan aıyrý jazasy taǵaıyndaldy», - dedi Damır Habıbýlın.

«Memlekettik qyzmet týraly» zańǵa sáıkes, baǵynyshty qyzmetkerlerdiń sybaılas jemqorlyq qylmystary úshin basshylardyń derbes jaýapkershiligi qarastyrylǵan. Atap aıtqanda, aıyptaý úkimi kúshine engennen keıin memlekettik saıası qyzmetshiler 10 kún ishinde otstavkaǵa berýleri tıis.

Aıdos Júnisovtyń aıtýynsha, aýdan ákimi zań talaptaryn saqtaǵan. Oblys ákimi óziniń qaramaǵyndaǵy qyzmetkerdiń otstavkasyn qabyldamaı, oǵan qatań sógis túrinde tártiptik jaza qoldandy.

Buǵan deıin Maǵjan Jumabaev aýdany ákiminiń orynbasary aldap alǵan 200 myń teńge úshin 3 jylǵa bas bostandyǵynan aıyrylǵanyn jazǵan edik.