SQO-da órt qaýipsizdigi taqyrybyndaǵy balalar baıqaýyna 600-den astam sýret tústi

PETROPAVL. QazAqparat – Soltústik Qazaqstan oblysynda órt qaýipsizdigi taqyrybynda ótken balalar baıqaýyna 600-den astam jumys usynyldy. Jas sýretshilerdiń týyndylaryn aldaǵy demalys kúnderi Petropavldaǵy saýda ortalyqtarynyń birinde ótetin kórmede tamashalaýǵa bolady, dep habarlaıdy QazAqparat tilshisi.

SQO tótenshe jaǵdaılar departamenti baspasóz qyzmetiniń málimetinshe, baıqaýǵa balabaqsha tárbıelenýshilerinen bastap, 9-synyp oqýshylaryna deıin qatysýǵa múmkindik aldy.

Balalarǵa «Turmystaǵy órt qaýipsizdigi», «Órtterdiń aldyn alý jáne órt kezindegi is-áreketter», «Ot-dos, ot-jaý» jáne «Balalardyń otpen oınaýy» taqyryptary berildi.

Qazylar alqasyna jeńimpazdardy anyqtaý ońaı bolǵan joq. Baıqaýǵa 600-den astam jumys tústi.

«Balalar sýretterinde órt sóndirýshilerdiń kúndelikti jumysyn kórsetip, baqylaýsyz ot qanshalyqty qaýipti jáne órt týyndamas úshin qandaı erejelerdi saqtaý qajet ekenin kórsetti. Baıqaýǵa qatysýshylar tańdaý boıynsha qaryndashty nemese akvarel men gýashti paıdalandy. Barlyq jumystar qyzyqty, mazmundy boldy. Baıqaýdyń maqsaty balalarǵa túsinikti bolǵany anyq, olar óz eńbekterinde órttiń qanshalyqty qaýipti ekenin kórsete bildi», - deıdi SQO TJD memlekettik órt baqylaý basqarmasynyń tehnıkalyq norma bóliminiń aǵa ınjeneri Marına Samoılenko.

Baıqaý shartyna sáıkes jeńimpazdar úsh jas sanaty boıynsha anyqtaldy.

Balabaqsha tárbıelenýshileri arasynda 1-oryndy «Aq kógershin» bóbekjaıynyń tárbıelenýshisi Iklas Mansýr jáne «ABVGDeıka SK» balalar ortalyǵynan Ilnar Ramazanov ıelendi.

1-4 synyp oqýshylary arasynda úzdik sýret avtorlary dep Petropavldaǵy Birinshi gımnazııa oqýshylary Anneta Zolotareva, Darına Marsova tanyldy.

Al 5-9 synyp oqýshylary arasynda Ledenev orta mektebiń oqýshysy Sabına Buzaýbasova men Alabota orta mektebiniń oqýshysy Eldos Jangeldi jeńimpaz atandy. Balalar syılyqtarmen marapattaldy.

Balalardyń sýretterin 22-23 mamyr kúnderi «CITY MALL» saýda ortalyǵynda ótetin kórmeden tamashalaýǵa bolady.