SQO-da orman sharýashylyqtary órtke qarsy tolyq jaraqtandyrylmaǵan

<p>PETROPAVL. KAZINFORM &ndash; Soltústik Qazaqstan oblysynda naýryzda orman sharýashylyqtaryna komıssııalyq tekseris júrgizilip, olardyń órt qaýpi joǵary kezeńge daıyndyǵyn tekserdi. Bul salada sheshimin kútken másele jeterlik.</p>

SQO tabıǵı resýrstar jáne tabıǵat paıdalanýdy retteý basqarmasynyń málimetinshe, ákimdiktiń qaramaǵynda 12 orman sharýashylyǵy mekemesi jáne «Krasnyı Bor» janýarlar dúnıesin qorǵaý jáne ósimin molaıtý jónindegi mekeme bar. Orman mekemeleriniń mindeti - ormandy molyqtyrý, orman qoryn órtten, zııankesterden, aýrýlardan qorǵaý. 

«Byltyr orman qoryna qaýip tóndiretin 169 órt tirkeldi, onyń 24-i orman órtine ulasyp, 78,7 gektar aýmaqqa zaqym keldi, kelgen shyǵyn – 15 mln teńgege jýyq.  Órtpen kúresý úshin Reseıdiń shekaralas oblystarymen kelisimder jasaldy. Sońǵy 3 jylda orman ıelenýshiler jergilikti bıýdjetten bólingen 644 mln teńgege 65 arnaıy tehnıka - 22 traktor, 35 patrýldik avtomashına, 10 tirkemeli órt modýlin satyp aldy. Bıyl 338 mln teńge bólindi, oǵan 2 órt sóndirý mashınasyn, 8 traktordy, 12 kvadrakopterdi jáne 36 aǵash otyrǵyzý mashınasyn alýdy josparladyq», - deıdi basqarmanyń basshysy Beıbit Ismanov.

Qazirgi ýaqytta orman sharýashylyqtaryndaǵy órt sóndirý mashınalarynyń 44% jáne traktorlardyń 40% paıdalaný merzimi 15 jyldan asyp ketken. 

«Bıyl naýryzda óńirdegi orman sharýashylyqtarynyń órt qaýpi joǵary maýsymǵa daıyndyǵyna komıssııalyq tekserý júrgizildi. Daıyndyqty tekserý qorytyndysy boıynsha 10 balldyq júıemen 7 balǵa baǵalandy. Oǵan orman sharýashylyqtarynda órt sóndirý stansalarynyń jetkiliksiz bolýy áser etti. 38 stansa qajet bolsa, qazir 14-i ǵana bar. Sondaı-aq, 28 órt sóndirý avtomashınalary bolýy qajet, onyń tek 25-i bar. Órt baqylaý munaralarynyń sany jetkiliksiz, onyń 15-in jańadan turǵyzý kerek», - deıdi Beıbit Ismanov.

Basqarma basshysynyń aıtýynsha, orman sharýashylyqtarynda bar órt sóndirý stansalary eskirgen, beıimdelgen ǵımarattarda ornalasqan jáne talaptarǵa saı kelmeıdi.

«2022 jyly jergilikti bıýdjetten 20 mln teńge bólinip, Petropavldaǵy «Qyzyljar» jáne M.Jumabaev aýdanyndaǵy «Býlaevskoe» orman sharýashylyqtarynda jańa órt sóndirý stansalarynyń jobalyq-smetalyq qujaty ázirlendi. Ekeýiniń qurylysyna 600 mln teńgeden astam qarajat kerek boldy. Al jalpy orman qorynda órt oshaqtaryn erte anyqtaý úshin qazir 16 ınteraktıvti beınebaqylaý júıesi, 3 dron qoldanylady. Oblystyq ákimdiktiń qoldaýynyń arqasynda orman mekemelerin materıaldyq-tehnıkalyq jaraqtandyrý 87% qurap otyr. Bul respýblıka boıynsha eń úzdik kórsetkishterdiń biri. Tehnıka men jabdyq únemi jańartylyp keledi», - deıdi Beıbit Ismanov.

Buǵan deıin SQO-da tasqyn sýdyń kóp qoqys ákelýine baılanysty órt shyǵý qaýpiniń artqanyn aıtqan edik.