SQO-da orman mekemeleri memleketke keltirilgen 53 mln teńge shyǵynnyń ornyn toltyrdy

<p>PETROPAVL. KAZINFORM — Soltústik Qazaqstan oblysynda mamandandyrylǵan tabıǵat qorǵaý prokýrory orman qoryn qorǵaý jóninde sharalar qabyldady. Zań buzýshylyqtarǵa jol bergeni úshin orman mekemeleriniń 4 dırektory tártiptik jaýapkershilikke tartyldy.</p>

SQO prokýratýrasynyń málimetinshe, vedomstvo tabıǵat qorǵaý zańnamasy salasyndaǵy zań buzýshylyqtardy anyqtaý jáne jolyn kesý boıynsha júıeli jumys júrgizip keledi. 

Orman zańnamasynyń saqtalýyn taldaý barysynda orman alqabyna keltirilgen zalaldy óteý jóninde sharalar qoldanylmaǵandyǵy, sondaı-aq «Jasyl Qazaqstan» ulttyq jobasynyń tıisinshe oryndalmaýy, onyń ishinde esepke alynbaǵan ormandar boıynsha jumystyń júrgizilmegendigi anyqtaldy. 

Orman kodeksiniń talaptaryna qaramastan, oblystyq tabıǵı resýrstar jáne tabıǵat paıdalanýdy retteý basqarmasynyń laýazymdy tulǵalary 2006 jyldan bastap Petropavl qalasy eldi mekenderiniń aýmaǵyn keńeıtý maqsatynda orman alqaptaryn joıǵany úshin 53 mln teńge soma shamasynda shyǵynnyń ornyn toltyrý jóninde sharalar qabyldamaǵan.

«Aqan-seri», «Burlyq», «Mamlıýt» jáne «Esil» orman sharýashylyqtary Kodeks talaptaryn buza otyryp, 2023 jyly ormandy molyqtyrý kólemin ulǵaıtý boıynsha kórsetkishterge qol jetkizbegen.

Taǵy bir jaǵdaıda agroónerkásiptik keshen sýbektisi Ekologııalyq kodeksti elemeı, saldarynan orman alqabynyń aýmaǵynda ammıak tógilgen. Bul orman qorynyń búlinýine ákep soqtyrdy. 
Munda da orman mekemesi zalaldy óteý boıynsha ýaqtyly sharalar qabyldamaǵan.

Prokýrorlyq qadaǵalaý aktileri boıynsha memleketke 53,2 mln teńge zalal óteldi, orman mekemesiniń 4 dırektory tártiptik jaýapkershilikke tartyldy.

Sonymen qatar, prokýratýranyń usynysy boıynsha bıyl memlekettik orman qoryna kirmegen orman alqaptaryn esepke alý boıynsha bastapqy jumystar júrgizildi.

Buǵan deıin polıtseıler Býrabaı tabıǵı aımaǵyn dronnyń kómegimen kúzetetindigin jazǵan edik.