SQO-da onlaın sanaq boıynsha turǵyndardyń belsendiligi tómen
Ulttyq statıstıka bıýrosynyń SQO boıynsha departamentiniń málimetinshe, 9 qyrkúıekte óńirde 17 717 adam onlaın sanaqtan ótken. Bul barlyq oblys turǵyndarynyń tek 3,3%-y ǵana. Jalpy óńirde, mamandardyń esebi boıynsha, qazir 540 826 adam bar.
«Ulttyq sanaqqa onlaın qatysyp jatqan turǵyndardyń belsendiligi ázirge tómen. Ekinshi kezeń bastalǵaly on kúndeıi ótip ketti. Aldyn ala boljam boıynsha, respýblıka turǵyndarynyń 30%-y ulttyq sanaqtan qashyqtan ótedi dep josparlanǵan. SQO-da da sol meje. Halyq arasynda túsindirý jumystary júrgizilip jatyr, 10 myńnan astam jadynama tarattyq. Oblys boıynsha 100-den astam banner ilindi», - deıdi Ulttyq statıstıka bıýrosynyń SQO boıynsha departamenti basshysynyń orynbasary Juldyz Nurǵalıeva.
SQO turǵyndardy onlaın sanaqpen qamtý boıynsha respýblıkada sońynan 4-5 oryndarda keledi.
«1 qazannan bastap ulttyq sanaqqa ıntervıýerler qosylady. Olar úı-úıdi aralap, málimetti planshetke engizedi. Ekinshi kezeńge barlyǵy 700 adam tartylady dep josparlanǵan. Olardyń 89-y baqylaýshy-nusqaýshy bolsa, 610-y ıntervıýerler. Olardyń bireýi 800-den astam adamnan pikirterim júrgizýi tıis», - deıdi Juldyz Nurǵalıeva.
Esterińizge salamyz, sanaq.gov.kz saıty 15 qazanǵa deıin táýlik boıy qoljetimdi bolmaq. Osy merzimge deıin onlaın sanaqtan ótýge bolady. Al ótpegender 1-30 qazan aralyǵynda ıntervıýerlerdiń saýaldaryna jaýap bere alady. Sondaı-aq sanaq boıynsha saýal týǵan jaǵdaıda 1446 baılanys ortalyǵyna habarlasýǵa bolady. Qońyraý shalý tegin.