SQO-da oqý jyly qarsańynda aýyl mektepterine jańa avtobýstar berildi

PETROPAVL. QazAqparat – Soltústik Qazaqstan oblysynda aýyl mektepterine 29 jańa avtobýs tapsyryldy. Oqýshylardy qaýipsiz tasýǵa arnaıy jaraqtandyrylǵan kólik múmkindigi shekteýli balalarǵa da yńǵaıly bolmaq, dep habarlaıdy QazAqparat tilshisi.

SQO mektepteriniń avtoparki búgin 29 avtobýspen tolyqty. Oblys ákimi Aıdarbek Saparov jańa avtobýstardyń kiltin tabys etip, jınalǵan qaýymdy qýanyshty sátpen quttyqtady.

«Elimizde bilim salasyna árqashanda kóp kóńil bólinip keledi. Memlekettiń qoldaýynyń arqasynda óńirde bilim júıesin damytýǵa qomaqty qarjy baǵyttalǵan. Biz balalar qaýipsizdigin nyǵaıtýǵa erekshe mán berip otyrmyz.

Búgin aýyl mektepterine jańa 29 avtobýstyń kiltin tabys etemiz. Jańa avtobýstar oqýshylar úshin yńǵaıly ári qaýipsiz bolady. Barlyǵy aýyl mektepterine beriledi. Bul jumysty biz odan ári jalǵastyramyz», - dedi Aıdarbek Saparov.

Mektep avtobýstary qaýipsizdik beldikterimen, esikteri ashyq kezde qozǵalysty tejeıtin mehanızmmen, aýa baptaǵyshtarmen jabdyqtalǵan. Múmkindigi shekteýli balalar úshin pandýs jáne júrgizýshini shaqyratyn túıme ornatylǵan.

«Qazir SQO-nyń aýyl mektepterinde 143 avtobýs bar. Avtoparkti jańartý boıynsha jumys áli de jalǵasady. Balalardyń qaýipsizdigi, sapaly bilim alýy únemi nazarda, salaǵa qomaqty soma bólinip jatyr.

Memleket basshysynyń tapsyrmasyna oraı «Jaıly mektep» ulttyq jobasy aıasynda Petropavlda 4 zamanaýı mektep salynady. «Bereke» shaǵyn aýdanynda korrektsııalyq mektep-ınternat qurylysy bastalady», - dedi SQO ákimi.

Óńir basshysynyń aıtýynsha, bıyl 49 mektepti kúrdeli jóndeýge 4,3 mlrd teńge bólindi. 2,8 mlrd teńge bilim ordalarynyń materıaldyq-tehnıkalyq bazasyn nyǵaıtýǵa jumsaldy. Onyń ishinde bilim berý uıymdaryn mamandandyrylǵan kúzetpen qamtý da bar.

SQO-da 1-4 synyp oqýshylaryn tegin tamaqpen qamtýǵa 1 mlrd teńge bólindi.

Mektepke deıingi bilim berý uıymdaryna degen qajettilikti jabý úshin jaqynda «Jas órken» jáne «Bereke» shaǵynaýdandarynda 2 balabaqsha qurylysy bastalmaq.