SQO-da «Nurly jer» baǵdarlamasymen jyl sońyna deıin 1 500-deı páter beriledi

ASTANA. QazAqparat -Soltústik Qazaqstan oblysynda bıyl «Nurly jer» jańa turǵyn úı baǵdarlamasy aıasynda 1 446 páter berý josparlanýda, dep habarlaıdy QazAqparat tilshisi.

Bul týraly Soltústik Qazaqstan oblysynyń ákimi Qumar Aqsaqalov Ortalyq kommýnıkatsııalar qyzmetinde ótken baspasóz máslıhatynda málim etti.

«Baspana alý kezegin qysqartý boıynsha múmkin bolǵan barlyq sharalardy qolǵa aldyq. «Nurly jer» jańa turǵyn úı baǵdarlamasy aıasynda bıyl jalpy aýdany 117,3 myń sharshy metrdi quraıtyn 16 turǵyn úı nemese 1 446 páter qoldanysqa beriledi. Bul kórsetkish ótken jylmen salystyrǵanda eki esege kóp», - dedi Q.Aqsaqalov.

Oblys basshysy keltirgen derekterge sáıkes, barlyq qarjylandyrý kózderi esebinen jalpy aýmaǵy 200 myń sharshy metr baspanany qoldanysqa berý josparlanǵan. Bul ótken jylǵy deńgeımen salystyrǵanda 122%-ǵa kóbirek.

Sońǵy jeti aıda oblys boıynsha 59 myń sharshy metr baspana paıdalanýǵa berildi.