SQO-da Naýryz meıramyna oraı respýblıkalyq aıtys ótti

<p>PETROPAVL. KAZINFORM &ndash; Soltústik Qazaqstan oblysynda Naýryz meıramyna arnalǵan respýblıkalyq aqyndar aıtysy ótti. Elimizdiń túkpir-túkpirinen kelgen myqty aıtyskerlerdiń dodasyn tamashalaýǵa qalyń qaýym jınaldy.&nbsp;</p>

Aıtystyń ashylýynda oblys ákimi Ǵaýez Nurmuhambetov sóz sóılep, jınalǵan halyqty ulttyq merekemen quttyqtady.

Foto: SQO ishki saıasat basqarmasy

Óńir basshysy qazylar alqasyn bastaǵan, aıtys óneriniń damýyna súbeli úlesin qosqan Júrsin Ermanǵa rızashylyǵyn bildirip, ıyǵyna shapan japty. SQO ákimi qazaqtyń tól ónerin jańǵyrtyp júrgen sýyryp salma aıtysker-aqyndarǵa alǵysyn aıtyp, shabyt pen shyǵarmashylyq tabystar tiledi.

Foto: SQO ishki saıasat basqarmasy

«Aıtysty soltústiktiń halqy erekshe saǵynyshpen kútedi. Búgin de tól ónerimizdi tamashalaýǵa kóp adam jınaldy.

Qyzyljar óńiri - kóptegen belgili azamattar dúnıege kelgen qasıetti meken. Sizderdi Ǵabıt, Sábıt, Qojabergen, Maǵjannyń rýhy árqashan qoldap júrsin», - dedi oblys ákimi Ǵaýez Nurmuhambetov.

Foto: SQO ishki saıasat basqarmasy

Teriskeıde ótken aıtys dodasy 7 saǵatqa sozyldy. Sýyryp salma aqyndar ár túrli qoǵamdyq taqyryptardy qozǵap, sahnadan aıtylǵan keleli oı-pikirler aıtys súıer qaýymnyń kóńilinen shyqty.

Dúbirli jyr báıgesinde ádil qazylardyń sheshimimen bas júldeni Meıirbek Sultanhan óz qanjyǵasyna baılady.

Foto: SQO ishki saıasat basqarmasy

Birinshi oryndy Tólegen Jamanov jeńip alsa, ekinshi oryndy Maqsat Ahanov jáne Nurbol Jaýynbaev ıelendi. Úshinshi orynǵa Iran-Ǵaıyp Kúzembaev, Aıym Asylbekqyzy, Qazyret Berdihan jáne óńir namysyn qorǵaǵan Jarqyn Juparhan laıyqty dep tanyldy.

Júldegerlerge aqshalaı sertıfıkattar men dıplomdar tabys etildi. Yntalandyrý syılyǵy jeti aqynǵa berildi.