SQO-da nan qymbattamas úshin sharýashylyqta naýbaıhanalardy iske qosý kerek - ákim
Bıyl kúzde elimizde bıdaı ekinshi ret qymbattady. «Azyq-túlik kelisimshart korporatsııasy» ulttyq kompanııasy qyrkúıek aıynda 3 klasty bıdaıdyń tonnasyn sapasyna qaraı 76 myń teńgege deıin alsa, qazir astyqtyń bir tonnasyna 85 myń teńge berip otyr.
Bul nan-toqash jáne kondıterlik ónimderdiń baǵasyna áser etpeı qoımasy anyq. Statıstıkalyq málimetterge súıensek, bıyl unnyń baǵasy 23,2% ósse, nan 18,4% qymbattady. Unnan pisiriletin kondıterlik ónimderiniń baǵasy - 6,6%, makaron ónimderiniki - 6,4% artqan.
SQO ákimdiginiń otyrysynda óńir basshysy Qumar Aqsaqalov nan baǵasyn bir qalypta ustaý úshin eldi mekenderdegi sharýashylyqtarda naýbaıhanalardyń jumysyn jandandyrýǵa keńes berdi.
«Ár sharýashylyqta buryn naýbaıhana bolatyn. Qondyrǵylar qalýy tıis, un jetkilikti. Nan arzan bolýy úshin qaıta iske qosý kerek. Alysqa tasymaldaýdyń qajeti bolmaǵandyqtan shyǵyn azaıady, nannyń da baǵasy tómen bolady. Bıdaı baǵasy qymbattap jatyr. Astyqtyń tonnasy qazir 87 myń teńgeden satylyp jatyr. Byltyr onyń quny eń kóp degende 50 myń teńge boldy», - dedi oblys ákimi Qumar Aqsaqalov.