SQO-da muǵalim jalǵan dıplommen uzaq ýaqyt jumys istep kelgen
Búgin SQO prokýratýrasy vedomstvoaralyq keńes ótkizip, oǵan jergilikti atqarýshy, quqyq qorǵaý organdary, bilim berý mekemeleriniń ókilderi qatysty. Taqyryp – 2022-2023 jyldardaǵy kámeletke tolmaǵandar arasyndaǵy quqyq buzýshylyqtyń aldyn alý jumysynyń qorytyndysy.
Tekseris barysynda júıeli túrde bolǵan zań buzýshylyqtar anyqtaldy. Sonyń ishinde kámeletke tolmaǵan balalarmen aldyn alý jumystaryn júrgizetin komıssııanyń tek qaǵaz júzinde ǵana óz mindetin atqarǵan.
«Aıyrtaý aýdanyndaǵy bastaýysh synyp muǵalimi jalǵan dıplommen jumys istep kelgendigi anyqtaldy. Prokýratýranyń suraýymen dıplom joǵary oqý ornynda rastalmady. Osy derekke qatysty qylmystyq is qozǵaldy. Biraq sotqa deıingi tergeý ýaqyttyń ótýine baılanysty toqtatyldy. Birneshe jyl zańsyz jumys istep kelgen muǵalim jumystan shyǵaryldy. Osyndaı jaǵdaıǵa jol bergen mektep ákimshiligi de jazasyz qalmaıdy», - deıdi oblys prokýrorynyń aǵa kómekshisi Vıktor Naıda.
Oblystyń keı mektepterinde terrorızmge, órtke qarsy jáne sanıtarlyq talaptar saqtalmaǵan. Endi zań buzýshylyqtar anyqtalǵan mektepterde olardyń dırektorlary men jaýapty tulǵalar ákimshilik, tipti qylmystyq jaýapkershilikke tartylmaq.