SQO-da monıtorıngtik toptar 19 adamǵa 1,1 mln teńge aıyppul saldy

PETROPAVL. QazAqparat – Soltústik Qazaqstan oblysynda monıtorıng barysynda dámhanalar men meıramhanalardyń jańajyldyq korporatıvterge tapsyrys qabyldap jatqany anyqtaldy, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, 1 qarashadan bastap óńirde monıtorıngtik toptar 139 reıd júrgizgen. Nátıjesinde 766 nysan tekserildi. Talaptardy buzǵan 19 tulǵa jaýapkershilikke tartylyp, olarǵa jalpy somasy 1 mln 123 myń teńge mólsherinde aıyppul salyndy.

«Biz jaǵdaıdy baqylaýda ustap otyrmyz. Qazirgi shekteý sharalary epıdahýaldy qalypta ustaýǵa múmkindik berip otyr. Egerde aýyrǵandar sany kúrt artatyn bolsa, onda árıne, shekteý sharalary taǵy da qatańdatylady. Alaıda munyń bári siz ben bizge qatysty. Eger de talaptardy ustansaq, vaktsına alsaq, oıyn-toılardy qysqartsaq – jaǵdaı jaqsarady. Qazir biz meıramhanalar men dámhanalarǵa monıtorıng jasap jatyrmyz. Olardyń barlyǵy jańajyldyq korporatıvterge tapsyrystar alyp qoıǵan. Bul – asyǵystyq. Eger de biz osylaısha «qyzyl» aımaqta otyrsaq, onda jańajyldyq keshterdiń ótýi ekitalaı, oǵan ruqsat bermeımiz. Tájirıbe kórsetkendeı, ár merekeden keıin bizde aýyrǵandar sany kúrt artady», - deıdi Arman Kúshbasov.

SQO 1,5 aıdan beri «qyzyl» aımaqta tur. El boıynsha kúndelikti juqtyrǵandar sanynan alda keledi. Máselen ótken táýlikte koronavırýs juqtyrýdyń 149 jaǵdaıy tirkelgen. Eki syrqat kóz jumyp, qaıtys bolǵandar sany 345-ke jetti.