SQO-da monıtorıngtik top ınfektsııalyq emdeý mekemelerin tekserdi

PETROPAVL. QazAqparat – Soltústik Qazaqstan oblysynda monıtorıngtik top Petropavldaǵy ınfektsııalyq emdeý mekemelerinde bolyp, COVID-19- dan emdelip jatqan syrqattardyń jaǵdaıyn bildi, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttiginiń SQO boıynsha departament jetekshisiniń birinshi orynbasary Nurlan Jahın bastaǵan monıtorıngtik top aldymen Petropavldaǵy №1 qalalyq aýrýhananyń ınfektsııalyq statsıonarynda boldy.

Medıtsınalyq qyzmettiń sapasy men kórsetiletin qyzmettiń qanshalyqty tolyq berilip jatqanyn baıqaý ol bizdiń 3-shi monıtorıngtik toptyń maqsaty. Áleýmettik jelige monıtorıng júrgizý barysynda emhanalardyń jumysyna qatysty syn aıtylyp jatady. Biz emdeý mekemelerinde, dárihanalarda medıtsınalyq preparattardyń qorynyń bolýyn, sapaly qyzmet kórsetilýin, dárigerlerdiń jetkilikti bolýyn, olardyń alyp jatqan ústemeaqylarynyń ýaqytynda tólenýin nazarda ustaımyz. Jalpy syntýdyrǵan másele boıynsha jumys isteımiz», - deıdi Nurlan Jahın.

№1 qalalyq aýrýhananyń ınfektsııalyq statsıonary 180 orynǵa shaqtalǵan.

Qazir munda 97 adam em alyp jatyr. Olardyń beseýiniń jaǵdaıy aýyr, jansaqtaý bólimshesine ornalastyrylǵan.

«Bizdiń statsıonar birinshi deńgeıli bolyp esepteledi. Ókpesi qabynǵan, demalýy qıyn, ıaǵnı koronavırýs ınfektsııasynyń aýyr túrimen aýyrǵandar em alady. Syrqattardy táýlik boıy qabyldaımyz. Turǵyndar aýyrǵan jaǵdaıda ózderi kele alady nemese bizge jedel járdem qyzmeti, mobıldi toptar jetkizedi.

Byltyr shilde-tamyz aılarynda táýligine 150-160 adamnan qabyldaǵan kezderimiz boldy. Keıin qarasha-jeltoqsanda sýyq tııý, juqpaly vırýstyq respıratorlyq ınfektsııalar taraý kezinde naýqastar kóp boldy. Qazir jaǵdaı turaqty», - deıdi Petropavldaǵy №1 qalalyq aýrýhana bas dárigeriniń orynbasary Artem Kolesnık.

Monıtorıngtik top barǵan ekinshi nysan - byltyr úsh aıdyń ishinde salynyp, paıdalanýǵa berilgen jańa modýldik ınfektsııalyq aýrýhana. Emdeý mekemesi 200 orynǵa shaqtalǵan. Qazir munda 84 adam emdelip jatyr.

«Búgin eki emdeý mekemesinde boldyq. Sonyń biri modýldi ınfektsııalyq aýrýhana. Basqa óńirlerde osyndaı aýrýhanalardyń sapasyna qatysty kóp syn aıtyldy, sýyq dedi. Búgin SQO-da -31 gradýs sýyq, soǵan qaramastan aýrýhananyń ishi jyly. Koronavırýspen qatty aýyryp jatqan naýqastar osynda shoǵyrlanǵan. Munda olarǵa jaqsy jaǵdaı jasalǵan. Qajetti dári-dármek jetkilikti. Eki aýrýhanada da kemshilikter anyqtalǵan joq», - dedi Sybaılas jemqorlyqqa qarsy is-qımyl agenttiginiń SQO boıynsha departament jetekshisiniń birinshi orynbasary Nurlan Jahın.

Monıtorıngtik top bıyldyqqa 4 tekseris júrgizdi. Kemshilikter anyqtalǵan joq.