SQO-da mereke kúni 20 shaqty áleýmettik nysan paıdalanýǵa berildi
Soltústik Qazaqstan oblysy Ǵ.Músirepov aýdany Novoıshımka aýylynyń turǵyndary úshin búgin qos mereke. Astana kúni 26 otbasyna aýdan ákimi kópten kútken baspanalarynyń kiltterin saltanatty túrde tabys etti.
Búgin Shahmanovtar shańyraǵynda úlken toı. Buǵan deıin árkimniń úıin jaǵalap kelgen kóp balaly otbasynyń kópten kútken armany oryndaldy. «Nurly jer» baǵdarlamasy boıynsha úıelmen jaıly da, keń 3 bólmeli páterge kirdi. Otaǵasy Qanatbek temirjolda júrgizýshi, zaıyby Asyljan balabaqshada tárbıeshiniń kómekshisi bolyp eńbek etedi eken.
Aýdan ortalyǵy Novoıshımde salynǵan kóp qabatty úıden jańa páterler kóp balaly otbasylarǵa, áleýmettik az qamtylǵan, múgedekter men jetimderge jáne memlekettik qyzmetshilerge buıyrdy.
Sonymen qatar Rýzaevka aýylynda 60 oryndyq «FK Rýzaevka.kz» qonaq úıi ashyldy. Jergilikti kásipker bos turǵan eki qabatty úıdi satyp alyp, 35 mln teńgege kúrdeli jóndegen.
«Qonaq úıde hostel de jumys isteıdi. Eń basty qonaqtarymyz ol árıne, sportshylar. Bizdiń eldi mekende sport jaqsy damyǵan. Fýtbol oınaýǵa kelgen oıynshylarǵa jaıly bolsyn dep yńǵaıly kerýetter, teledıdar qoıdyq. Ashanasy bólek jumys isteıdi. Maqsatymyz - buqaralyq jáne kásibı sporttyń damýyna óz úlesimizdi qosý», - deıdi kásipker Igor Romanenko.
Tamyz aıynyń sońynda Novoıshım eldi mekeninde taǵy bir kóp qabatty úıdiń qurylysy bastalmaq. Oǵan respýblıkalyq qazynadan 84 mln teńge bólinipti.
Jalpy SQO boıynsha mereke kúnderi 20-ǵa jýyq áleýmettik nysan ashylady dep josparlanǵan. Buǵan deıin aıtqanymyzdaı, eldi mekenderde dámhana, monsha, sport alańdary, kovorkıng ortalyqtar ashylyp, birneshe jańa tseh jumysyn bastamaq.