SQO-da mereke kúnderi polıtsııaǵa qońyraýlar sany 1,5 myńǵa jýyqtaǵan

PETROPAVL. QazAqparat – Soltústik Qazaqstan oblysynda polıtseıler úsh kún demalysta 1478 telefon qońyraýyn qabyldap, 340-yna jedel áreket etti, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, vedomstvo mereke kúnderindegi kezekshilikti qorytyndylady. Petropavlda ǵana bir táýlikte polıtseıler men Ulttyq Ulannyń áskerı qyzmetshileri sapynan 260 adam kezekshilik etti. Olar 5 modýlde, 58 jaıaý patrýlde jáne eki aýysymda 17 avtopatrýlde jumys istedi.

Bul kúnderi Petropavl qalalyq polıtsııasynyń jedel basqarý ortalyǵy da beınekameralar arqyly qoǵamdyq tártipti jáne jol qaýipsizdigin qadaǵalady. Nátıjesinde tek beınekameralar arqyly ǵana 141 ákimshilik zańbuzýshylyq tirkeldi. Onyń 101-i jolda júrý erejelerin buzýǵa, qalǵany qoǵamdyq oryndarda spırttik ishimdikti ishýge qatysty. Eki urlyqty jáne bir buzaqylyqty ashýǵa múmkindik beretin derekter anyqtaldy.

«Demalys kúnderi ádettegideı ótti. «102» kanalyna 1478 telefon habarlamasy tústi. Onyń 340-yna jedel áreket etý qajet boldy. Sonyń ishinde 16-sy urlyqqa jáne 19-y otbasylyq janjalǵa qatysty boldy», - deıdi SQO PD shtaby bastyǵynyń orynbasary Baqytjan Álbekov.

Aıta keteıik, mereke emes kúnderi SQO-da polıtsııaǵa bir táýlikte ortasha 300 qońyraý túsedi.