SQO-da memlekettik qyzmettegi ár besinshi áıel – basshy

PETROPAVL. QazAqparat – Soltústik Qazaqstan oblysynda memlekettik qyzmette 2 490 qyz-kelinshek eńbek etse, sonyń ár besinshisi basqarmany ne bólimdi basqarady. Solardyń biri – Ýálıhanov aýdany Kishkenekól aýylynyń týmasy Janar Musaıbekova. Ol sambo men dzıýdodan sport sheberine úmitker, qazir aýdandyq dene shynyqtyrý jáne sport bólimin basqaryp otyr. Memlekettik qyzmetshilerdiń kásibı merekesi qarsańynda QazAqparat tilshisi mamandy áńgimege tartqan edi.

- Sambomen, dzıýdomen aınalysady ekensiz, áıel adamǵa sporttyń bul túrleri aýyr emes pe?

- Iıa, bul ekeýi de eptilikpen qatar qara kúshti qajet etedi. Eger sporttyń túri unasa, onymen qyzyǵa aınalyssań, esh aýyrlyǵy joq. Biraq, bizdiń óńirde sambo men dzıýdo áıelder arasynda keń taramaǵan, oǵan jarystardyń ótkizilmeýi sebep shyǵar. Al, elimizde qyzdar arasynda jaqsy sportshylar kóp.

- Ózińiz sportqa qalaı keldińiz?

- Sportqa bet burýyma ákem áser etti. Qaıyrken Ýálıshanuly Musaıbekov – erkin kúresten respýblıkalyq chempıonattyń qola júldegeri. Ol kisi meniń de erkin kúrespen aınalysqanymdy qalady. Biraq, aýylda qyzdar arasynda erkin kúres sektsııasy bolmady. Degenmen, mektepte oqyp júrgende-aq sportqa jaqyn boldym. Kókshetaýdyń joǵary oqý ornyna dene shynyqtyrý muǵalimi mamandyǵy boıynsha tústim. Sonda sambomen aınalysa bastadym. Keıin jattyqtyrýshym aýysyp, ol dzıýdoshy boldy. Sóıtip, men sambony da, dzıýdony da qatar alyp júrdim.

- Qaısysy janyńyzǵa jaqynyraq?

- Dzıýdo maǵan kóbirek unaıdy. Ekeýiniń bir-birinen aıyrmashylyǵy – dzıýdoda qarsylasyńdy syǵyp, qysýǵa bolady, al sambo – kúrestiń bir túri. 2000 jyldardyń basynda sambo sportyna qyzyǵýshylyq kúrt artty. Qyzdar da kóptep jazyldy, biraq olardyń tek biren-sarany ǵana qalyp, nátıjege qol jetkizdi. Sondyqtan, jattyǵýlar negizinen er adamdarmen ótetin. Olar bizdi renjitpeýge tyrysyp, qurmetpen qaraıtyn. Óıtkeni, aýyr bolǵandyqtan, qyzdar sporttyń bul túrin kóp tańdaı bermeıdi.

- Qaı sport bolmasyn adamnyń denesin ǵana emes, minezin de shynyqtyrady, shyńdaıdy, bul áıeldik bolmysty joımaı ma?

- Áıel adam birneshe isti qatar alyp júredi, sonyń ishinde jaqsy sportshy da, meıirimdi ana da bolady. Óz ádemiligin de joǵaltpaıdy. Bul rette kóp nárse jattyqtyrýshyǵa da baılanysty. Iá, minez jaǵynan kelisemin. Bir baıqaǵanym, sportpen aınalysqan qyz-kelinshekter batyl, óz-ózine senimdi bolady.

- Sporttaǵy ádis-tásilderdi tatamıden tys qoldanýǵa májbúr bolǵan kezderińiz bar ma?

- Iıa, ózimdi qorǵaý úshin ómirde kúsh qoldanýǵa týra kelgen jaǵdaılar boldy. 2004 jylǵy bir oqıǵa esime túsip otyr. Keshqurym qonaqtan shyǵyp, úıge qaraı bet aldym. Kóshede maǵan qarama-qarsy er adam kele jatty. Jaqyndaı bere ol meniń qolymnan shap berip ustap, aǵashtar arasyna tarta jóneldi. Men de qarap qalǵan joqpyn, qolyn qaıyryp, ol buzaqyny polıtseılerge ustap berdim.

- Qazir jarystarǵa shyǵyp júrsiz be?

- Joq, jarystarǵa shyǵyp júrgen joqpyn. Sebebi, jumys kóp, onyń ústine bólim basshysy bolǵandyqtan, jaýapkershilik te joǵary. Jarysqa jınalǵan sportshylardy qadaǵalap, jaǵdaılaryn jasaý kerek. Sońǵy ret 2018 jyly oblystyq áıelder spartakıadasyna erkin kúresten qatysqan edim. Sol joly 62 kg salmaq dárejesinde kúmis júldeni jeńip aldym.

- Memlekettik qyzmet sport jolynan jeńil emes bolar?

- Bıyl memlekettik qyzmette júrgenime 16 jyl bolady. Ýnıversıtetti bitirisimen-aq qujattarymdy jınap, qyzmetke turdym. Bastapqyda mádenıet bóliminde eńbek ettim, keıin ishki saıasatqa aýysyp, bilim bóliminde de tájirıbe jınadym. Menińshe, bul – úlken mektep. Bir orynda toqtap turý joq, únemi jańa adamdarmen tanysyp, jańalyqtyń ortasynda júresiń. Basqa salaǵa aýysamyn dep oılaǵan emespin, óıtkeni maǵan bul jumys unaıdy. Ár qyzmettiń óz qıyndyǵy bar. Al, memlekettik qyzmetshilerge artylar júk eki ese aýyr. Keıde birer kún qyzmetpen júrip, úıdiń betin kórmeıtin kezder bolady. Biz, tipti oıyn-toılarda da ádep pen etıkany umytpaýymyz kerek.

- Otbasyńyz jaıynda aıtyńyzshy, balalaryńyz sportqa jaqyn ba?

- Ulym, eki qyzym bar. 16 jastaǵy ulym men 13 jasar qyzym mektepte oqıdy, kenjem balabaqshaǵa barady. Ákemniń jolyn qýsyn dep, ul-qyzymdy erkin kúreske berdim. Biraq, olarǵa unamady, gir sportyna ketti. Tańdaý nege sporttyń osy túrine túskenin bilmeımin. Qazir bıik belesterdi baǵyndyryp júr. Ekeýi de Qazaqstan, Azııa chempıony boldy. Kelesi aıda Bishkekke álem chempıonatyna barady. Al, kenje qyzym áli kishkentaı. Biraq, qazirdiń ózinde karatemen aınalysýdy armandap júr. Ázirge aýdanymyzda karate bólimi joq, ashylǵan boıda beremin.

- Bala tárbıesinde basty orynǵa neni qoıasyz?

- Balalardy túsiný kerek jáne baǵyt-baǵdar berip otyrǵan jón. Jalpy, ár ata-ananyń armany – balalarynyń jetistigin kórý ǵoı, ómirden óz oryndaryn tapsa eken deımin.

- Áńgimeńizge rahmet!