SQO-da memlekettik qyzmetshilerdiń 64 paıyzy - áıelder

PETROPAVL. QazAqparat – Soltústik Qazaqstan oblysynda memlekettik qyzmette eńbek etip júrgenderdiń 64 %-y qyz-kelinshekter bolsa, laýazymdy qyzmette otyrǵandardyń 25,4 %-y - áıelder, dep habarlaıdy QazAqparat tilshisi.

SQO-nyń aýyldyq jerlerdegi atqarýshy organdarynda kadr jetispeýshiligi máselesin sheshý úshin «Dıplommen aýylǵa» memlekettik baǵdarlamasy qoldanylyp jatyr. Nátıjesinde aýyldyq ákimdikterge bas jáne jetekshi mamandardyń 10-y jumysqa alynǵan. Olarǵa kótermeaqy tólenip, turǵyn úı qurylysyna nemese baspana alýǵa áleýmettik qoldaý kórsetildi. Bul jaıynda búgin Memlekettik qyzmet isteri agenttiginiń SQO boıynsha departamentiniń basshysy Elena Stepanenko óńirlik kommýnıkatsııalar qyzmetinde aıtty.

«Memlekettik organdardyń negizgi mindetteriniń biri – memlekettik qyzmetshilerdi ustap qalý. Memlekettik qyzmet isteri agenttiginiń strategııalyq jospary boıynsha almasýshylyq 6,9 %-dan aspaýy tıis. Oblysta bul kórsetkish - 4,1 %-dan aspaıdy. Osylaısha memlekettik qyzmette 3 jyldan artyq jumys istegenderdiń sany 1356 adam nemese 58 %-dy quraıdy. Memlekettik qyzmettegi ortasha eńbek ótili 11,4 jylǵa jetti», - deıdi Elena Stepanenko.

Jyl basynan jergilikti atqarýshy organ qyzmetkerleriniń 78 %-ynyń laýazymy ósken.

Elena Stepanenkonyń aıtýynsha, qazir memlekettik qyzmette júrgenderdiń 64 %-y - qyz-kelinshekter. 139 áıel basshylyq qyzmette otyr. Bul barlyq jetekshilerdiń 25,4 %-y.