SQO-da memlekettik aýdıtordyń ózi teksergen mekeme esebinen tamaqtanǵany anyqtaldy

PETROPAVL. QazAqparat – Soltústik Qazaqstan oblysynda tekserý komıssııasynyń memlekettik aýdıtory tekserip jatqan sýbekti esebinen tamaqtanǵany úshin jazalanbaq, dep habarlaıdy QazAqparat tilshisi.

Memlekettik qyzmet salasyndaǵy baqylaý basqarmasynyń málimetinshe, Ádep jónindegi keńeste SQO boıynsha Tekserý komıssııasynyń qarjyny basqarýǵa jáne kvazımemlekettik sektor sýbektilerin paıdalanýǵa memlekettik aýdıt bóliminiń bas ınspektory-memlekettik aýdıtory A.Qurmanǵalıǵa qatysty tártiptik is qaraldy.

Qyzmettik tergeý barysynda A. Qurmanǵalı issaparda bolǵan kezinde óziniń tekserýshi retinde laýazymdyq ókilettikterin paıdalanǵany anyqtaldy. Osylaısha tekserip jatqan jaqtyń esebinen tegin tamaqtanǵan.

«A.Qurmanǵalıge tekserýdiń barlyq kezeńine táýliktik shyǵystar jáne turǵyn úı jaldaý shyǵystary tólengenine qaramastan, ol issapar qarajatyn jumsamaı, demalys kúnderi birneshe ret úıine barǵan.

Máseleni qaraý qorytyndysy boıynsha Ádep jónindegi keńes músheleri A. Qurmanǵalıdi óziniń laýazymdyq ókilettikterin materıaldyq múddelerin qanaǵattandyrýǵa baılanysty paıdalanyp, «Qazaqstan Respýblıkasynyń memlekettik qyzmeti týraly» Zańnyń 50-baby 1-tarmaǵynyń 2) tarmaqshasyn buzǵany úshin qyzmetine tolyq sáıkes emestigi týraly eskertý túrindegi tártiptik jazaǵa tartýdy usyndy», - deıdi Memlekettik qyzmet salasyndaǵy baqylaý basqarmasynyń bas mamany Ergeldi Qaıyrgeldi.