SQO-da memlekettik aýdıtor olqylyqtarǵa kóz jumǵany úshin 300 lıtr benzın suraǵan
SQO Sybaılas jemqorlyqqa qarsy qyzmet SQO boıynsha tekserý komıssııasynyń múshesi Kenjebaevqa qatysty qylmystyq isti qarady. Memlekettik aýdıtor 2021 jyldyń qarasha aıynda birneshe ret para alyp, ustalǵan edi.
Byltyr jeltoqsan aıynyń sońynda Petropavl qalasy sotynyń úkimimen Kenjebaev QR QK 366-baby 3-bólimi boıynsha sottaldy. Sot ony 7 jylǵa bas bostandyǵynan aıyryp, memlekettik qyzmette, sotta, jergilikti ózin-ózi basqarý organdarynda, QR Ulttyq Bankinde jáne onyń vedomstvolarynda, Qarjy naryǵyn retteý, baqylaý jáne qadaǵalaý jónindegi ýákiletti organda, qarjy uıymdarynda, memlekettik uıymdardyń jáne kvazımemlekettik sektor sýbektilerinde laýazymdardy atqarý quqyǵynan ómir boıyna aıyrdy. Sottalǵan jazasyn qylmystyq-atqarý júıesiniń ortasha qaýipsizdiktegi mekemesinde óteıdi, sondaı-aq para retinde alynǵan soma - 2 565 940 teńgeni qaıtarady.
«2021 jyldyń qarashasynda Aıyrtaý aýdandyq halyqqa qyzmet kórsetý ortalyǵyna memlekettik aýdıt júrgizý barysynda Kenjebaev birqatar olqylyqty anyqtaǵan. Kináliler ol úshin tártiptik jaýapkershilikke jáne keıbir zań buzýshylyqtar úshin ákimshilik jaýapkershilikke tartylyp, keltirilgen shyǵynnyń ornyn toltyrýy tıis edi.
Alaıda, Kenjebaev ortalyqtyń laýazymdy tulǵalaryna aýdıtorlyq esepte anyqtalǵan olqylyqtardy kórsetpeıtinin aıtqan, sol úshin 2,5 mln teńge syıaqy suraǵan.
Ortalyq basshylary jaýapkershilikten qorqyp, qaltaǵa basqan qarajatty qaıtarý kerek bolatynyn eskerip, aýdıtordyń usynysyn qabyl alady», - deıdi SQO Sybaılas jemqorlyqqa qarsy qyzmet basshysynyń orynbasary Aıdos Júnisov.
Kenjebaev 2021 jyldyń qarasha aıynda memlekettik aýdıtorlarmen birge oblystyq jumyspen qamtýdy úılestirý jáne áleýmettik baǵdarlamalar basqarmasyn jáne oǵan qarasty mekemelerdi tekserip, arnaıy áleýmettik qyzmetterdi berýde, memlekettik satyp alýlarda jáne býhgalterlik esepte zań buzýshylyqtardy anyqtaıdy.
«Aýdıtorlyq topty basqarǵan Kenjebaev anyqtalǵan zań buzýshylyqtarǵa baılanysty basqarma basshysy Qoshmanovtyń tártiptik jaýapkershilikke tartylatynyn túsinip, onymen jeke kezdesedi. Máselege kóz juma qaraǵany úshin syıaqy retinde AI-95 markaly benzınniń 300 lıtrin suraıdy.
Qoshmanov qaltasynan qarajat shyǵarmaı Kenjebaevqa para berý úshin, ózi basqaryp otyrǵan basqarmadan AI-95 markaly benzınniń 400 lıtrin alǵan. Onyń 300-in aýdıtorǵa berse, qalǵanyn óz paıdasyna jaratpaq bolyp alyp qalǵan», - deıdi Aıdos Júnisov.
Petropavl qalalyq sotynyń úkimimen Qoshmanov ózine senip tapsyrylǵan múlikti ysyrap etkeni jáne para bergeni úshin 2 mln teńgege jýyq aıyppul tóledi.
Al Aıyrtaý aýdandyq halyqqa qyzmet kórsetý ortalyǵynyń laýazymdy tulǵalaryna qatysty qylmystyq is olardyń tergeýdi júrgizýge kómekteskeni úshin, qylmys týraly aıtqandary úshin toqtatyldy.