SQO-da memqyzmetshiler qandaı buıymdardy syılyqqa alǵan

PETROPAVL. QazAqparat – Soltústik Qazaqstan oblysynda bıyl memlekettik qyzmetshiler memlekettik múlik jáne jekeshelendirý departamentine ózderine syılaǵan bes syılyqty ótkizgen, dep habarlaıdy QazAqparat tilshisi.

SQO memlekettik múlik jáne jekeshelendirý departamentiniń málimetinshe, bıyl departamentte esepke jekelegen negizder boıynsha túsken múlikti odan ári paıdalanýdy aıqyndaý boıynsha vedomstvoaralyq komıssııanyń segiz otyrysy ótken. Oǵan memlekettik qyzmetkerlerge beriletin syılyqtar da jatady. Byltyr bir ǵana syılyq tapsyrylǵan - «Qus súti» kámpıtiniń qorapshasy merziminiń ótýine baılanysty joıylǵan.

«Bıyl jyl basynan departament 5 syılyqty qabyldap aldy. Olar – 2 dana qalamsap, estý apparaty, kózildirik jáne valıdol dárisi. Olardyń barlyǵy jalpy somasy 8 103 teńgege satyldy», - deıdi departament basshysy Aman Tóregeldın.

Sapasy men qaýipsizdigi normatıvtik qujattardyń talaptaryna sáıkes kelmeıtin azyq-túlik shıkizaty, tamaq ónimderi, shyǵý tegi belgilenbegen alkogol ónimi jáne temeki, Qazaqstan Respýblıkasy zańnamasynyń talaptaryna jáne sanıtarııalyq-epıdemıologııalyq qaǵıdalar men normalarǵa sáıkes kelmeıtin, aktsızdik tańbalarsyz ózge de buıymdar joıylady.

«Bıyl jyl basynan 2 myńnan astam ónim joıyldy. Onyń 2 014-i araq-sharap shólmegi. Ótken jyldyń uqsas kezeńinde 2 327-i dana buıym joıyldy, onyń ishinde 1 842 shólmek jáne 476 qorap temeki ónimderi», - deıdi Aman Tóregeldın.