SQO-da mektepter aıazǵa baılanysty qashyqtan oqytýǵa kóship jatyr
SQO bilim basqarmasy baspasóz qyzmetiniń málimetinshe, oblystyq tótenshe jaǵdaılar departamentinen aıazǵa baılanysty eskertý keldi. Alaıda ár mektep qashyqtan oqýǵa kóshýdi ózdiginen sheshedi.
«Oblysta 458 mektep bar, onyń 7-ýi - ınternat. Aýa raıynyń temperatýralyq rejımi boıynsha -25 gradýsta 0-4 synyptar, -27 gradýsta 0-9 synyptar jáne -30 gradýs aıazda 0-11 synyptar men kolledjerdiń 1-2 kýrs stýdentteri qashyqtyqtan oqýǵa aýystyrylady. Temperatýralyq rejım týraly aqparat bilim basqarmasynyń áleýmettik jelidegi resmı paraqshalarynda jáne barlyq bilim berý bólimderiniń paraqshalarynda jarııalanyp otyrady. Sabaqtyń qashyqtyqtan oqytý formatyna aýystyrylǵanyn synyp jetekshileri oqýyshlar men ata-analardy der kezinde eskertip otyrýlary qajet», - deıdi basqarmanyń baspasóz hatshysy Ásel Orazbaeva.
Petropavldaǵy Qojabergen jyraý atyndaǵy №6 mektep erteń tańerteń saǵat 7.00-de -30 gradýs bolatynyn eskerip, birinshi aýysymnyń 0-11 synyp oqýshylaryn qashyqtan oqýǵa kóshirdi.
SQO-da 15 aqpannan beri aıaz. «Qazgıdromet» RMK málimetinshe, qatty sýyq 23 aqpanǵa deıin saqtalmaq. Petropavl qalasyn boıynsha túnde synap baǵanasy -28 gradýstan -32 gradýsqa deıin tómendemek. Oblys aýmaǵynyń keı aýdandarynda -35 gradýsqa deıin sýytady degen boljam bar. Kúndiz Petropavlda -15, -23 aralyǵynda bolsa, oblysta -25-ke deıin sýytpaq.
Buǵan deıin SQO polıtsııa departamentiniń qyzmetkerleri Petropavl qalasynyń birneshe mektebine shabýyldaımyz dep áleýmettik jelide jazba qaldyrǵandardy izdestirip jatqanyn aıtqan edik. Belgisiz bireýler 19 aqpan kúni Petropavldaǵy 7 mektepke shabýyldaıtynyn aıtyp áleýmettik jelide jazba qaldyrǵan edi.