SQO-da medsaqtandyrý ujymy mereke toılaýdyń ornyna balalarǵa qýanysh syılady

PETROPAVL. QazAqparat – Soltústik Qazaqstan oblysynda «Áleýmettik medıtsınalyq saqtandyrý qory» KEAQ fılıaly qyzmetkerleri jańa jyl merekesin ujym bolyp meıramhanada toılaýdan bas tartyp, onyń ornyna №13 orta mektepte «Balalarǵa qýanysh syıla» qaıyrymdylyq aktsııasyn ótkizdi, dep habarlaıdy QazAqparat tilshisi.

«ÁMSQ» KEAQ SQO boıynsha fılıal baspasóz qyzmetiniń habarlaýynsha, qor ujymy bul sheshimdi biraýyzdan qoldady. «Balalarǵa qýanysh syıla» aktsııasyn ótkizý úshin olar Petropavldaǵy ınklıýzıvti baǵyttaǵy №13 orta mektepti tańdaǵan. Táýelsizdik kúni merekesinde medıtsınalyq saqtandyrý qory fılıalynyń ókilderi «Jas Ulan» balalar men jasóspirimder uıymynyń qataryna qabyldanǵan 16 oqýshyǵa kógildir galstýk taǵyp, oqýda tabys tiledi.

«Qazaqstan halqy úshin bul merekeniń mánisi zor. Árqaısymyz úshin Otan – ottan ystyq. Al osy elimizdiń bolashaǵy senderdiń qoldaryńda. Bizdiń ujym senderdiń jetistikterińdi atap ótýdi jón kórdi. Bul kúni eshkim syılyqsyz qalmaıdy», - dedi balalardy meırammen quttyqtaǵan «ÁMSQ» KEAQ SQO boıynsha fılıalynyń bólim basshysy Murat Jákenov.

Oqýda ozat, qoǵamdyq ómirde belsendi oqýshylarǵa qalam-bloknottar, uıaly telefondarǵa arnalǵan aksessýarlar tabys etildi. Qor ujymynyń qarajaty esebinen kásibı mıkrofondar, jyljymaly proektor jáne mıkrofonǵa arnalǵan tireý satyp alynyp, mektepke kómek retinde syıǵa berildi.

«Biz syılyq jasamas buryn mektep ákimshiligimen kezdesip, aqyldastyq. Balalardyń án aıtýdy jaqsy kóretinin bilgennen keıin, ujymmen keńese otyryp, osyndaı kásibı qural-jabdyqtardy syıǵa tartýdy sheshtik», - deıdi Murat Jákenov.

№13 orta mektepte 20 jyldan astam óz qatarlastarymen birge tirek-qımyl apparaty zaqymdanǵan balalar da bilim alyp keledi. Bul jerde olardyń oqýyna, jan-jaqty damýyna bar jaǵdaı jasalǵan.