SQO-da medıtsınalyq poıyz mamandary boıjetkennen týa bitken anomalııany anyqtady

<p>PETROPAVL. KAZINFORM — Soltústik Qazaqstan oblysynda bolǵan «Salamatty Qazaqstan» medıtsınalyq poıyz mamandary bir apta ishinde 2651 turǵyndy qarap, kómek kórsetti.</p>

Dárigerler qabyldaý kezinde sırek kezdesetin aýrý túrlerin de anyqtaǵan. Máselen 18 jastaǵy qyz balaǵa «jatyr aplazııasy» dıagnozy qoıyldy.

«Jatyr aplazııasy» — jatyr múshesiniń bolmaýy. «Salamatty Qazaqstan» medıtsınalyq poıyzynyń quramyndaǵy gınekolog mamanǵa júgingen boıjetken osy ýaqytqa deıin etekkir tsıklynyń múldem bolmaǵanyn aıtqan. Ýltradybystyq tekserý barysynda qyz balanyń reprodýktıvti júıesiniń damymaǵany anyqtaldy. Bul, mamandardyń aıtýynsha, týa bitken anomalııa bolyp esepteledi. Dárigerler boıjetkenge qosymsha tekserilýge, MRT jasatýǵa keńes berdi. Mundaı jaǵdaıda dertti ýaqytynda anyqtap, bilikti mamannyń kómegine júginý asa mańyzdy. 

«Salamatty Qazaqstan» medıtsınalyq poıyzy SQO-da Aqsýat, Qaırankól, Presnogorkovskaıa, Taıynsha, Chkalov, Daýyt, Qyzyl tý stantsııalaryna toqtap, turǵyndardy qabyldady. 

«Áleýmettik medıtsınalyq saqtandyrý qory» KE AQ SQO boıynsha fılıalynyń dırektory Aınagúl Davletchınanyń aıtýynsha, medıtsınalyq poıyzdaǵy mamandar bir apta ishinde 2651 adamdy, sonyń ishinde 416 balany tekserýden ótkizdi. 

«Turǵyndar medıtsınalyq poıyzdaǵy mamandarǵa kóriný úshin kezekke turdy. Eń kóp suranysqa ıe bolǵan — terapevt, 876 adam maman tekserisinen ótti. Hırýrgke shamamen ár tórtinshi adam qaraldy. Aýyldyq jerlerde nevropatolog suranysqa ıe, sol sebepti 530 adam maman qabyldaýynda boldy. 294 adam stomatologke kórinip, dáriger 276 tisti juldy. Myńǵa jýyq zerthanalyq tekseris, rentgen, ÝZI, EKG jasaldy. Munyń bári MÁMS aıasynda aqysyz negizde júrgizildi», — deıdi Aınagúl Davletchına. 

Buǵan deıin SQO-da jeti aıda 49 adamnyń koronavırýspen aýyrǵanyn jazǵan edik.