SQO-da maýsym aıy bastalǵaly úsh bala sýǵa batyp, shomylatyn oryndar tekserildi
SQO ákimdiginde ótken otyrysta sýǵa shomylý maýsymynda adamdardyń ólimine jol bermeý úshin qolǵa alynǵan sharalar jaıy talqylandy. Oǵan sebep te joq emes, maýsym aıy bastalǵaly óńirde úsh jasóspirim sýǵa batyp ketti. Oblystyq tótenshe jaǵdaılar departamentiniń mamandary, ákimdik ınspektorlary halyq shomylýǵa kóp baratyn oryndardy tekserip shyqty. Esil, Qyzyljar, Aıyrtaý jáne Ǵ.Músirepov atyndaǵy aýdandarda, Petropavlda arnaıy jaraqtandyrylmaǵan shomylatyn oryndarda qaýipti ekendigin eskertetin bir de bir belgi bolmaǵan. Jergilikti atqarýshy organdar bul jerlerde mobıldi qutqarý beketterin uıymdastyrmaǵan.
«Balalar sýǵa ketken sońǵy úsh jaǵdaıda da ózen-kóldiń basynda sýǵa shomylýǵa tyıym salynatyndyǵy týraly eskertý bolmaǵan. Ǵ.Músirepov atyndaǵy aýdannyń eki kommýnaldyq jaǵajaıynda qaýipsiz demalys úshin jaǵdaı jasalmaǵan. ıAǵnı olar demalýshylardy qabyldaýǵa daıyn emes, munda sýǵa shomylý qaýipti.
Petropavlda eki arnaıy oryn belgilengen. Sonyń biri – Esil ózenindegi resmı jaǵajaıda qaýipsiz demalys úshin qandaı da bir ınfraqurylym joq. Sondaı-aq bul jaǵajaıdyń aıdynyn teksergen kezde, jaǵadan 1,5-2 metr qashyqtyqta sý astyndaǵy topyraqty tasqyn kezinde 5,5-6 metr tereńdikke deıin shaıyp ketkendigi anyqtaldy.
Sol sebepti bul shomylatyn oryndy belgilengen normalar men talapqa saı keltirilgenshe jabý qajet», - deıdi SQO TJD bastyǵynyń mindetin atqarýshy Dmıtrıı Rastıhın.
Mamannyń aıtýynsha, qazirgi ýaqytta SQO-da sýǵa shomylýǵa arnalǵan 60 oryn bar, onyń 50-i ǵana búginde qaýipsiz. Aıyrtaý aýdanyndaǵy demalys oryndarynyń 6 jaǵajaıy ázirge jabyq, al tórteýi: Esil ózenindegi qalalyq jaǵajaı, Abakshıno demalys ornyndaǵy jáne Ǵ.Músirepov atyndaǵy aýdannyń eki jaǵajaıy adamdardyń qaýipsiz demalysyna daıyn emes.
Buǵan deıin Petropavlda 3,2 mlrd teńgege ústel tennısi ortalyǵy salynyp jatqanyn jazǵan edik.