SQO-da maskúnem anasyn uryp óltirip, 11 jylǵa sottaldy

<p>PETROPAVL. KAZINFORM &ndash; Soltústik Qazaqstan oblysynyń qylmystyq ister jónindegi mamandandyrylǵan aýdanaralyq soty týǵan anasyn uryp óltirgen 59 jastaǵy er adamdy 11 jylǵa bas bostandyǵynan aıyrdy.</p>

SQO sotynyń málimetinshe, oqıǵa bıyl 9 tamyzda Taıynsha qalasynda bolǵan. B. esimdi er adam óz úıinde anasyn óltirdi. 

B.-nyń kinási jábirlenýshiniń, kýágerlerdiń aıǵaqtarymen, sot saraptamalarynyń nátıjelerimen jáne istiń basqa materıaldarymen dáleldengen.

Prokýror men jábirlenýshi B.-ny kináli dep tanýdy jáne 12 jylǵa bas bostandyǵynan aıyrý jazasyn taǵaıyndaýdy surady. Sottalýshy kinásin moıyndamaı, aqtaýdy surady.

Jasalǵan qylmystyń mán-jaıyn jáne onyń aýyrlyǵyn eskere otyryp, sot B.-ny QR Qylmystyq kodekstiń 99-baby 1-bóligi boıynsha kináli dep taýyp, oǵan 11 jylǵa bas bostandyǵynan aıyrý jazasyn kesti. Sottalýshy sondaı-aq jazasyn óteý ornynda maskúnemdikten májbúrli túrde emdeletin bolady. 

Úkim zańdy kúshine engen joq.

Buǵan deıin Petropavl turǵyny sot arqyly alaıaqtyq jolmen aırylǵan 1 mln teńgesin qaıtaryp alǵanyn jazǵan edik.