SQO-da mas kúıde kólik júrgizip, eki adamdy soǵyp óltirgen júrgizýshige sot úkimi shyqty

<p>PETROPAVL. KAZINFORM &ndash;&nbsp; Soltústik Qazaqstan oblysynyń qylmystyq ister jónindegi mamandandyrylǵan aýdanaralyq soty tas jolda eki adamdy soǵyp oqıǵa ornynan qashyp ketken er adamǵa qatysty qylmystyq isti qarady.</p>

SQO soty baspasóz qyzmetiniń málimetinshe, oqıǵa byltyr 5 tamyzda saǵat 23.30 shamasynda M.Jumabaev aýdanynda ornalasqan avtojolda bolǵan. E. esimdi júrgizýshi «Toyota Land Cruiser 100» markaly avtokólikti basqaryp kele jatyp, jolda H. jáne K.-ny qaǵyp ketken, sondaı-aq «Audi-80» markaly avtokólikpen soqtyǵysqan. Qylmystyq jaýapkershilikten qutylý úshin E. qylmys ornynan qashyp ketken. H. jáne K. oqıǵa ornynda alǵan dene jaraqattarynan qaıtys boldy.

Sot otyrysynda sottalýshy E. prokýrormen is júrgizý kelisimin jasaý úshin múmkindik berý týraly sotqa ótinish bildirdi. Mundaı kelisimdi jasaýdyń mindetti sharty - jábirlenýshilerdiń kelisimi. Osylaısha prokýror men sottalýshy E. arasynda jábirlenýshilerdiń kelisimimen is júrgizý kelisimi jasaldy. Prokýror sotta E.-ge kólik quraldaryn basqarý quqyǵynan 7 jylǵa jáne qylmystardyń jıyntyǵy boıynsha 5 jyl bas bostandyǵynan aıyrý túrindegi túpkilikti jaza qoldanýǵa ótinish beretin boldy.

Kelisim sharty boıynsha sottalýshy E. jábirlenýshilerge ótemaqy qoryna májbúrli tólemdi tóleýge jáne is júrgizý shyǵyndaryn óteýge mindetteldi. Qorǵaýshy tarap is júrgizý kelisimi men prokýror suraǵan jazany qoldady.

Іs júrgizý kelisiminiń barlyq shartynyń saqtalýyn eskere otyryp, sot taraptardyń pikirin eskere otyryp, E.-ni 7 jyl merzimge kólik quraldaryn basqarý quqyǵynan aıyra otyryp, qylmystar jıyntyǵy boıynsha 5 jylǵa bas bostandyǵynan aıyrý túrindegi jaza taǵaıyndady.

Úkim zańdy kúshine engen joq.