SQO-da mas kúıde kólik júrgizgen ákim jumystan bosatyldy
Memlekettik qyzmet isteri agenttigi SQO boıynsha departamentiniń málimetinshe, oqıǵa 27 qańtarda saǵat 22.30 shamasynda Kókshetaý qalasynda bolǵan. Tártip saqshylary aýlalardyń birinde «Lada 21713» kóligin toqtatady. Rýlde Taıynsha aýdany Chkalov aýyldyq okrýginiń eks-ákimi Sáken Sádýaqasov bolǵan. Medıtsınalyq kýálandyrý onyń mas bolǵanyn kórsetti. Zańǵa sáıkes memlekettik qyzmetshi 15 táýlikke qamaýǵa alynyp, 7 jylǵa kólik basqarý quqyǵynan aıyryldy.
Memlekettik qyzmetshiniń Ádep kodeksin óreskel buzǵan Sádýaqasovtyń isi ádep jónindegi keńeste qaraldy. Eks-ákim óz kinásin moıyndady.
«Taıynsha aýdanynyń ákimine Chkalov aýyldyq okrýginiń ákimi S. T. Sádýaqasovqa zańdy kúshine engen sot aktisimen dáleldengen Qazaqstan Respýblıkasynyń zańdarynda belgilengen mindetter men shekteýlerdi saqtamaǵany úshin jumysynan bosatý túrindegi tártiptik jaza qoldanýdy usynamyz. Ol jalpy qabyldanǵan moraldyq-etıkalyq normalardy buzyp, qoǵamǵa jat minez-qulyqqa jol berdi, jumystan tys ýaqytta ortasha dárejede mas kúıinde avtokólikti basqaryp, jol qozǵalysynyń qaýipsizdigine qaýip tóndirdi», - deıdi Memlekettik qyzmet isteri agenttigi SQO boıynsha departamentiniń bas mamany Abzal Orazymbetov.
Bul bıyldyqqa rýlge mas kúıde otyryp, jumysynan aıyrylǵan ekinshi aýyldyq okrýg ákimi. Jalpy SQO-nyń ádep jónindegi keńesinde jyl basynan beri onǵa jýyq tártiptik is qaraldy.
Memlekettik qyzmetshilerdiń beseýine tártiptik jaza qoldaný jáne tórteýin jumystan bosatý usynyldy, bireýine qyzmettine sáıkes emes degen sheshim shyǵaryldy. Buǵan deıin Petropavlda 100 myń AQSh dollary kóleminde para alǵan kásiporyn basshysynyń 11 jylǵa bas bostandyǵynan aıyrylǵanyn jazǵan edik.