SQO-da mádenıet salasyna qajet mamandardy daıarlaýǵa 15 grant bólindi

PETROPAVL. QazAqparat – Soltústik Qazaqstan oblysynda mádenıet salasyna qajet mamandardyń ornyn toltyrý úshin bıyl bıýdjet esebinen 15 túlekke grant beriledi, dep habarlaıdy QazAqparat tilshisi.

SQO mádenıet, tilderdi damytý jáne arhıv isi basqarmasynyń basshysy Dosbol Ábdirısovtiń aıtýynsha, bólingen 15 granttyń barlyǵy joǵary oqý ornynda bilim alýǵa múmkindik beredi. Bul joba 7-8 jylǵa shaqtalǵan. ıAǵnı mádenıet salasyna qajet mamandardy ázirleý úshin jyl saıyn oblystyq bıýdjetten 15-20 grantqa qarjy bólinip otyrady. Osylaısha óńir 100 mamandy oqytyp almaq.

«Oblystyń mádenıet salasynda kadr jetispeýshiligi bar. Bizge teatr akterleri de, vokalıster de, dástúrli ánshiler de, mýzykalyq aspaptarda oınaıtyn mamandar da, rejısserler de kerek. Sondyqtan da oqý bitirgen túlekterdiń «qulaǵyna altyn syrǵa». UBT-nyń qajetti mejelik balyn jınasa, shyǵarmashylyq emtıhandy tapsyryp, biraq konkýrstan óte almaı qalsa, osy múmkindikti paıdalana alady. Qazir konkýrstyq komıssııa quramyz. Ázirge qaı joǵary oqý oryndaryna tańdaý túsetini belgisiz, tájirıbesine, bilim berý sapasyna qaraımyz», - deıdi basqarma basshysy.

SQO-nyń mádenıet salasynda qazir 1850 adam eńbek etedi, olardyń barlyǵy shyǵarmashylyq mamandary.

«2 myńǵa jýyq mamannyń 390-y – oblystyq mekemelerde eńbek etip jatyr, olar mýzykanttar, arhıv qyzmetkerleri, kitaphanashylar. Solardyń 155-iniń ǵana joǵary bilimi bar. Tipti mektep attestatymen jumys istep júrgender kezdesedi. Sondyqtan bizdiń maqsatymyz – maman tapshylyǵyn joıý jáne qyzmetkerler arasynda básekelestikti arttyrý», - deıdi Dosbol Ábdirısov.

Oblystyq bıýdjetten 15 grant úshin shamamen 8,5 mln teńge, oǵan qosymsha bir jylǵa stıpendııamen qamtýǵa 4,5 mln teńge bólinbekshi. Oblys ákiminiń grantyn alǵan jastar tórt jyl boıy bıýdjet esebinen oqyp shyǵady.