SQO-da mádenıet salasyndaǵy kadr jetispeýshiligi máselesi qalaı sheshilip jatyr

<p>Soltústik Qazaqstan oblysynyń mádenıet salasynda kadr jetispeýshiligi máselesi ózekti. Maman turaqtamaýyna ne sebep? &laquo;AMANAT&raquo; partııasy oblystyq fılıaly janyndaǵy &laquo;MIRAS&raquo; keńesiniń qorytyndy otyrysynda osy másele qozǵaldy, dep habarlaıdy <a href="Kazinform" target="_blank" rel="noopener">Kazinform</a>.</p>

Mamandardyń aıtýynsha, 2010 jyldan bastap SQO-nyń mádenıet salasynda kadr jetispeýshiligi máselesi ótkir tur. Sheshimi tabylmasa aldaǵy ýaqytta bul salada jumys isteıtin maman qalmaýy múmkin. Munyń aldyn alý úshin maqsatty jumys júrgizilýi tıis.

Eń aldymen, óner adamdarynyń joǵary synyp oqýshylarymen kezdesýlerin uıymdastyryp, kásiptik baǵdar bergen jón. Mádenıet salasynda maman turaqtamaýynyń basty sebebi - qyzmetkerleriniń tómen eńbekaqysy, baspana sııaqty áleýmettik máseleleriniń tıisti deńgeıde sheshilmeýi.

Oblystyq mádenıet basqarmasy basshysynyń orynbasary Sanat Áýbákirov bul máseleni sheshýge vedomstvo qaýqarsyz ekenin moıyndady.

Byltyrdan bastap SQO-da oblys ákiminiń granty berilip keledi, qazir 15 adam elimizdiń 5 joǵary oqý ornynda oryndaýshylyq óner, teatr óneri, rejıssýra, artmenedjment, mádenı-demalys jumysy mamandyqtary oqyp jatyr.

Bıyl osy maqsatqa 18 grant bólindi, olar: oryndaýshylyq óner, teatr óneri, beıneleý óneri, rejıssýra, art-menedjment, mádenı-demalys jumysy, mýzyka muǵalimderin daıarlaý mamandyqtary boıynsha. Qazirgi ýaqytta jastar Qazaq ulttyq óner ýnıversıtetinde, T. Júrgenov atyndaǵy Qazaq ulttyq óner akademııasynda, Qurmanǵazy atyndaǵy konservatorııada jáne Manash Qozybaev atyndaǵy Soltústik Qazaqstan ýnıversıtetinde bilim alyp jatyr.

Keńes otyrysynda mádenıet basqarmasynyń jumysyna qatysty birqatar syn aıtyldy. Máselen, belgili tulǵalardyń mereıtoılary tıisti deńgeıde atalyp ótip jatqan joq, merekelik is-sharalardyń baǵdarlamasy, formaty ózgertýdi talap etedi, dástúrli ánge, memlekettik tilge qajetinshe kóńil bólinbeıdi.

Mádenıet basqarmasy kelesi jyldyń josparyn «MIRAS» múshelerimen birlesip talqylaýdy usyndy. Sondaı-aq Sanat Áýbákirov Jol kartasynda josparlanǵan mádenıet nysandaryn kúrdeli jóndeý barysy jáne nátıjesi, oblys turǵyndaryn mádenı is-sharalarmen qamtý týraly esep berdi.