SQO-da lastanǵan aýmaqtardyń kartasy ázirlenbek

<p>PETROPAVL. KAZINFORM &ndash; Soltústik Qazaqstan oblysy &laquo;Taza Qazaqstan&raquo; jalpyulttyq naýqany aıasynda bastalǵan &laquo;Taza beısenbi&raquo; respýblıkalyq aktsııasyna qatysty. Óńir turǵyndary is-shara aıasynda eldi mekenderdi qoqystan tazartty.</p>

«AMANAT» partııasy SQO fılıalynyń málimetinshe, «Taza Qazaqstan» aktsııasynyń maqsaty - elimizdiń tazalyǵy men ásem tabıǵatyna qamqorlyq jasaıtyn sanaly ekologııalyq qoǵam qurý. Óńirlerde aldyn-ala eldi mekenderdiń lastanǵan aýmaqtarynyń kartalary ázirlenbek. Odan keıin árbir lastanǵan ýchaskege partııanyń bastaýysh partııa uıymdary men fılıaldary bekitilip, olar aı saıyn bekitilgen ýchaskelerde tártip pen tazalyqty saqtaýdy qamtamasyz etedi, sondaı-aq abattandyrý men ınfraqurylymdy damytýǵa baılanysty máselelerdi sheshedi.

Foto: «AMANAT» partııasy SQO fılıaly

SQO-da «Taza beısenbi» aktsııasyna 800-ge jýyq adam qatysty. Olardyń ishinde partııalyqtar, sportshylar, densaýlyq saqtaý salasynyń qyzmetkerleri, jastar, zeınetkerler men depýtattar bar. Petropavlda belsendiler 20-shy yqsham aýdandy qys boıy jınalyp qalǵan kúl-qoqystan tazartty.

«Jýkov kóshesi, 5v mekenjaıynyń mańynda ornalasqan ýchaske aldyn-ala tańdalyp alynǵan. Jumysqa «Novınteh» jáne «Kommýnhoz» JShS usynǵan 5 tehnıka jumyldyryldy. Sondaı-aq, 100-den astam volonter men belsendi qosyldy. Aıta keteıin, bul aktsııa apta saıyn ótetin bolady», - dedi «AMANAT» partııasynyń SQOF atqarýshy hatshysy Jeńis Asanov.

Grek-rım kúresinen halyqaralyq dárejedegi sport sheberi, Qazaqstan ulttyq quramasynyń múshesi Amanǵalı Bekbolatov ta tazalyq aktsııasyna qatysty.

«Búginde qalada qoqys óte kóp. Bárimiz bir adamdaı kúsh salýymyz kerek. Jastarǵa úlgi kórsetýimiz qajet. Qorshaǵan ortaǵa beıjaı qaramaı, eń aldymen tazalyqty ózimizden bastaıyq», - deıdi Amanǵalı Bekbolatov.

Nátıjesinde is-shara aıasynda 105 tonna qoqys jınap, qaladan shyǵaryldy. 

Buǵan deıin Ertis ormanynda órt shyǵyp, ony jańa júıeniń kómegimen tez anyqtaý múmkin bolǵanyn jazǵan edik.