SQO-da qyzmetkeri artyq jumys istegeni úshin mekeme basshysy jazalanady

PETROPAVL. QazAqparat - SQO-da memlekettik organ qyzmetkerleri jumysty keshke qalyp isteıtin bolsa, basshysy jazaǵa tartylady, dep habarlaıdy QazAqparat tilshisi.

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń SQO boıynsha departamentiniń málimetinshe, memlekettik qyzmetkerler arasynda tártip buzý azaıǵan. 220-dan 170-ke, ıaǵnı 23% kemidi. Memlekettik qyzmetkerlerdiń de jumystan keıin qalyp, eńbek etýi azaıǵan. Ol úshin memlekettik organdarda jumys kompıýterin bir mezette sóndiretin avtomatty júıe iske qosyldy.

«Memlekettik qyzmetshilerdiń eńbek jáne basqa da quqyqtarynyń buzylýyna jol bergen memlekettik 6 organnyń basshylaryna ákimshilik yqpal etildi. Memlekettik qyzmetshiler jumystan bos ýaqytta eńbek etkeni úshin qosymsha aqy aldy nemese qosymsha demalys berildi. 80-nen astam qyzmetkerdiń quqyǵy qorǵaldy», - deıdi departament basshysy Elena Stepanenko.

Departament «QR Memlekettik qyzmeti týraly» Zańnyń jáne memlekettik qyzmetshilerdiń etıkalyq kodeksiniń saqtalýyna baılanysty memlekettik organdarda 8 tekseris ótkizdi. Nátıjesinde 62 zańbuzýshylyq anyqtalǵan. Tekseris qorytyndysy boıynsha 3 usynys jáne 2 uıǵarym berildi. 3 memlekettik qyzmetshi tártiptik jaýapkershilikke tartyldy.

«Oblystyq orman sharýashylyǵy jáne janýarlar dúnıesi aýmaqtyq ınspektsııasyn tekserý barysynda bólim basshysyna tártiptik jaza qoldaný reti buzylǵany anyqtaldy. Tártiptik jaýapkershilikti qoldanbas buryn qyzmettik tekseris júrgizilmegen. Sol sııaqty qurylys, sáýlet jáne qala qurylysy basqarmasynyń bas mamanyn da tártiptik jazaǵa tartpas buryn qyzmettik tekseris júrgizilmegen», - deıdi Elena Stepanenko.

Departament basshysynyń aıtýynsha, memlekettik qyzmetkerlerdiń quqyqtary qorǵalyp, zańsyz qoldanylǵan tártiptik jaza alyndy.