SQO-da KVI juqtyrǵandar sany kúrt artty

PETROPAVL. QazAqparat – Soltústik Qazaqstan oblysynda koronavırýs juqtyrǵandar sany kóbeıip keledi. Bir táýlikte aýyrǵandar sany birden eki ese artty, dep habarlaıdy QazAqparat tilshisi.

SQO óńirlik kommýnıkatsııalar qyzmetinde koronavırýstyń taralýy jáne vaktsınatsııa barysy týraly baspasóz máslıhaty ótti. Sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, 11 qańtar kúni oblysta 31 adamda koronavırýs anyqtalsa, ótken táýlikte koronavırýs juqtyrýdyń jańa 59 jaǵdaıy tirkelgen. Sonyń 93 %-ynda aýrý belgileri bolǵan. Syrqattanǵandardyń jartysy – Petropavl turǵyndary.

«Keshe QR Premer-Mınıstriniń orynbasary Eraly Toǵjanovtyń tóraǵalyǵymen el aýmaǵynda koronavırýstyq ınfektsııanyń taralýyna jol bermeý jónindegi vedomstvoaralyq komıssııanyń otyrysy ótti. Vedomstvoaralyq komıssııa ınfektsııanyń taralýyn boldyrmaý úshin sanıtarııalyq-karantındik sharalardy qatańdatý týraly sheshim qabyldady. Atap aıtqanda, saýda ortalyqtaryna, saýda úıleri men karaokege tek «jasyl» mártebesi barlarǵa jáne «omıkron» shtamynyń tez taralýyna baılanysty 13 qańtardan bastap SPA-ǵa, sporttyq-saýyqtyrý jáne fıtnes-ortalyqtaryna tek «jasyl» mártebesi bar turǵyndarǵa kirýge ruqsat beriledi. 15 qańtardan bastap vaktsınatsııa mártebesine qaramastan, shetelden kelgenderdiń barlyǵy PTR testiniń nátıjesin kórsetýi tıis», - deıdi Arman Kúshbasov.

SQO-da osy kúnge deıin 35 162 adamnan koronavırýs anyqtaldy. Búginde óńir «jasyl» aımaqta.