SQO-da KVI juqtyrǵandar sany azaıdy

PETROPAVL. QazAqparat – Soltústik Qazaqstan oblysynda koronavırýs juqtyrǵandar sany ótken aptamen salystyrǵanda shamamen eki esege azaıdy. Infektsııalyq statsıonarlarda oryndar bosap jatyr, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, ótken táýlikte koronavırýs juqtyrýdyń jańa 73 jaǵdaıy tirkeldi. Máselen osydan bir apta buryn, 25 qarashada 138 soltústikqazaqstandyqta KVI anyqtalǵan bolatyn. Qazir ınfektsııalyq statsıonarlarda 478 adam em alyp jatyr, emdeý mekemeleri 29 %-ǵa ǵana júktelgen. Jansaqtaý bólimshelerinde 45 syrqat jatyr. Ókinishke oraı, ótken táýlikte taǵy eki syrqat kóz jumdy, barlyǵy 376 adam qaıtys boldy.

SQO - epıdemıologııalyq ahýaldy baǵalaý matrıtsasy boıynsha «qyzyl» aımaqta. Jalpy indet bastalǵaly óńirde 33 066 adam KVI juqtyrsa, sonyń 1 013-i – medıtsınalyq qyzmetkerler. 28 968 syrqat táýir boldy.