SQO-da kúzge deıin 92 CLAAS kombaıny qurastyrylady

NUR-SULTAN. QazAqparat – Soltústik Qazaqstan oblysynyń ákimi Qumar Aqsaqalov ortalyq kommýnıkatsııalar qyzmetine ótken baspasóz konferentsııasynda CLAAS transulttyq kompanııasynyń ınvstıtsııalyq jobasy qandaı sharttar aıasynda iske asatynyn túsindirdi, dep habarlaıdy QazAqparat.

«Bizdiń óńirdegi aýyl sharýashylyǵy tehnıkasynyń qatty eskirýi - eń ózekti másele bolyp otyr. Dıqandar tuqymdy ýaqtyly seýip, der kezinde ora almaıtyndaı jaǵdaıǵa jetken. Sondyqtan aldymyzda aýyl sharýashylyǵy taýarlaryn óndirýshilerdi sapaly, tıimdiligi joǵary, eń bastysy baǵasy qoljetimdi tehnıkamen qamtý mindeti tur. CLAAS kompanııasymen eki jyldaı kelissóz júrgizdik», - dedi oblys basshysy.

Ákimniń aıtýynsha, germanııalyq kontsern ókilderi 21 maýsymda ǵana arnaıy ınvestıtsııalyq kelisimshartqa qol qoıǵan.

«Ol qujat kompanııa bizdegi keshenge óndiristi tutas engizýge mindetteledi. Olar ózderine sondaı mindet alyp otyr. Eger óndiristi tutastandyrmasa, ınvestor retinde bizdiń memleket usynatyn barlyq jeńildikterdi memleketke qaıtarady. ıAǵnı, búgin olardyń arnaıy ınvestıtsııalyq kelisimshartqa qol qoıýy arqasynda kombaındar men tuqym sebetin traktorlardyń baǵasy kem degende 42 paıyz arzandaıdy. Jergilikti bıýdjettiń múmkindikterin paıdalansaq, 52 paıyzǵa deıin arzandatýǵa bolady. Bul biz úshin óte mańyzdy. Biz bıyl oraq naýqanyna deıin 92 kombaın qurap shyǵarýymyz kerek», - dedi Qumar Aqsaqalov.