SQO-da qutqarýshylar qatty boran soǵatynyn eskertti

PETROPAVL. QazAqparat – Soltústik Qazaqstan oblysynda 15-16 qańtar kúnderi aýa raıy buzylyp, qatty boran bolady dep eskertý jarııalandy, dep habarlaıdy QazAqparat tilshisi.

SQO tótenshe jaǵdaılar departamenti baspasóz qyzmetiniń málimetinshe, aldaǵy demalys kúnderi qalyń qar jaýyp, jeldiń ekpini 28 m/s deıin jetedi, sonyń saldarynan burqasyn men qatty boran bolmaq.

Avtojoldarda kórý shekteledi. Sondaı-aq, sınoptıkterdiń boljamynsha, bul kúnderi synap baǵanasy -2 gradýsqa deıin joǵarylap, onyń sońy kóktaıǵaqqa ákelmek.

Osyǵan baılanysty qutqarýshylar turǵyndarǵa qaýipsizdik sharalaryn eske saldy.

«Avtokólik ıelerine bul kúnderi alys jolǵa shyqpaýǵa, múmkindiginshe úıde bolýǵa keńes beremiz. Jolǵa shyqqan jaǵdaıda, kólikte kúrek, arqan, jyly kıim jáne janar-jaǵarmaı qory bolýy qajet. Ózderińizben birge kishkentaı balalardy, qart kisilerdi almańyzdar, sms-habarlamalardy, 112 qyzmetiniń jáne Darmen qosymshasynyń eskertýlerin eleýsiz qaldyrmańyzdar. Darmen mobıldi qosymshasyna aqparat birden túsedi, al uıaly baılanys operatorlary SMS-habarlamalardy kezek tártibimen jiberedi, bul 2 saǵatqa deıin ýaqyt alýy múmkin. Al tótenshe jaǵdaıda 112 telefonyna qońyraý shalýǵa bolady», - deıdi SQO Tótenshe jaǵdaılar departamenti tótenshe jaǵdaılardy joıý bóliminiń mamandary.