SQO-da qutqarýshylar qan tapsyrdy

PETROPAVL. QazAqparat – Soltústik Qazaqstan oblysynda tótenshe jaǵdaılar departamentiniń qyzmetkerleri «QR Qyzyl jarty aı» qoǵamynyń óńirlik fılıaly uıymdastyrǵan is-sharaǵa qatysyp, donor boldy, dep habarlaıdy QazAqparat tilshisi.

14 maýsym – Dúnıejúzilik donor kúni. Osyǵan oraı «QR Qyzyl jarty aı» qoǵamynyń oblystyq fılıaly Petropavlda qan tapsyrý kúnin uıymdastyrdy. Bul aktsııaǵa SQO TJD qyzmetkerleri de qatysty.

Vedomstvonyń baspasóz qyzmetiniń málimetinshe, bul kúni departamenttiń 30- dan astam qyzmetkeri qan ortalyǵyna baryp, donor boldy. Kúndelikti qyzmetinde ólimmen betpe-bet keletin mamandar bul ıgi istiń qanshalyqty mańyzdy ekenin biledi.

«Biz tótenshe jaıdaıda jumys istep, adamdardyń ómirin qutqaramyz. Qan tapsyrý arqyly da bireýdi ajaldan aman alyp qalyp jatsaq jaqsy emes pe?! Jaraqat alǵan adamǵa da, aýyr naýqasqa da dál qazirgi ýaqytta bizdiń qanymyz kerek bolýy múmkin. Sondyqtan mundaı is-sharalarǵa belsendi qatysamyz, adamdy qutqarý – bizdiń mindetimiz», - deıdi SQO TJD bastyǵynyń orynbasary Murat Qanǵojınov.