SQO-da qutqarýshylar jedel ota qajet eki áıeldi boranda aýrýhanaǵa jetkizdi
10:45, 19 Aqpan 2024
<p>PETROPAVL. KAZINFORM – Soltústik Qazaqstan oblysy Ýálıhanov aýdanynda joldy qar jaýyp qalýyna baılanysty qutqarýshylar jedel medıtsınalyq kómekke muqtaj 2 áıeldi aýrýhanaǵa jetkizdi.</p>
SQO Tótenshe jaǵdaılar departamenti baspasóz qyzmetiniń málimetinshe, 18 aqpan kúni saǵat 01:30-da «101» jedel arnasyna Tóljan aýyldyq okrýgi ákimi habarlasyp, Kóbensaı aýylyna jol talǵamaıtyn kólik jiberýdi suraıdy. Aıtýynsha, 60 jáne 34 jastaǵy eki áıelge shuǵyl medıtsınalyq kómek qajet bolǵan. Bireýi qolyn syndyryp alsa, ekinshisinde soqyr ishektiń belgileri bolǵan.
Al birer kún bolǵan boran saldarynan joldy qar jaýyp qalǵan. Kómekke jaqyn ornalasqan Talshyq aýylynyń № 8 órt sóndirý bóliminen TREKOL arnaıy kóligi dereý jolǵa shyǵarylyp, Ýálıhanov aýdany Kishkenekól aýdanynyń ortalyq aýrýhanasyna zardap shekkenderdi aman-esen jetkizdi.
Olardyń biri – Ýrzııa esimdi áıel qyzmetkerlerge kórsetken kómegi úshin alǵys bildirdi.